Кондак 1
Избранный от юности своея Господу поработати, многа страдания в болезнех претерпевый, и во иночество от лет малых призванный, угодниче Божий преподобне Боголепе, восхваляем тя с любовию, небеснаго предстателя, теплаго молитвеИкос 1нника и заступника нашего. Ты же, яко имеяй дерзновение ко Господу, молися о спасении нас грешных, чтущих святую память твою, да зовем ти:
Радуйся, преподобный отроче Боголепе, похвало земли нашея и чудотворче предивный.
Икос 1
ангельское твое житие провидев, всея твари Создатель от юности уготова тя в сосуд благодати избран. Ты бо издетска возлюбил еси единаго Бога, чистоту души и тела соблюдая и ко иночеству себе приуготовляя. Сего ради вси дивное житие и блаженную кончину твою ведуще, радостно тебе вопием:
Радуйся, благочестивых родителей твоих плоде благословенный;
радуйся, на земли ангельски поживый.
Радуйся, в день памяти святых князей страстотерпцев Бориса и Глеба рожденный;
радуйся, во святом крещении имя в честь святаго князя Бориса получивый.
Радуйся, подвигом твоим ангелы удививый;
радуйся, ко иночеству благословением Божиим призванный.
Радуйся, монахов светлое украшение;
радуйся, Пресвятыя Богородицы покровом осененный.
Радуйся, Российския державы славо и ограждение;
радуйся, Церкве Православныя светильниче.
Радуйся, в небесныя чертоги со славою введенный;
радуйся, с преподобными прославленный.
Радуйся, преподобный отроче Боголепе, похвало земли нашея и чудотворче предивный.
Кондак 2
Видя Господь души твоея доброту, от малых лет направи тя ко исканию единаго на потребу. Ты же, еще во граде Москве живый, возлюбил еси храмов Божиих благолепие, обителей иноческих красоту, и умилялся еси сердцем твоим, и тако во благочестии возрастая, воспевал еси непрестанно ангельскую песнь: Аллилуиа.
Икос 2
Разум просвещен от Бога имея, блаженне, аще и юн быв телом, но стар умом: вся бо мира красная от юности твоея пренебрег, Кондак 3детская игралища презрел еси, псалмы же и песни духовныя сердцем и усты непрестанно воспевал еси, колена преклоняя пред образы святыми. Научи и нас тако же мудрствовати и творити, вопиющих тебе сице:
Радуйся, града Москвы святое порождение;
радуйся, благочестивых твоих родителей отрадо и утешение.
Радуйся, дивное воздержание во младенчестве явивый;
радуйся, в среду и пяток млека матере твоея никакоже вкусивый.
Радуйся, яко обычаю детских игр нималоже внимал еси;
радуйся, яко Господь Бог благоизволи от юности освятити тя.
Радуйся, от пелен Церковь Божию возлюбивый;
радуйся, от младости в добром учении воспитанный.
Радуйся, благодатию Божиею водимый;
радуйся, службы церковныя всегда неленостно посещавый.
Радуйся, от юности Небеснаго Отечества взыскавый;
радуйся, все житие твое во угождение Богу посвятивый.
Радуйся, преподобный отроче Боголепе, похвало земли нашея и чудотворче предивный.
Кондак 3
Сила Вышняго воистину храняше тя, отроча святое, ибо даровася тебе крепость мужески претерпети тяжкия болезни и страдания плоти. Егда же, страждущу ти люте, явися ангел Господень, с небесе исцеление принес, вручи тебе одеяние с изображением Распятия и рече: «Се дар Божий за твое терпение, приими его». Ты же, блаженне, аки новое рождение восприяв, со страхом и радостию взывал еси Богу: Аллилуиа.
Икос 3
Имый в памяти бывшее тебе от ангела знамение, святче Божий, поведал еси родителем, яко Сам Господь измлада вложи в сердце твое ко иноческому житию великую ревность. Темже со слезами умолял еси их дати благословение на постриг, да приобщишися к работающим Господеви. Мы же, восхваляюще любовь твою к Богу, глаголем ти сице:
Радуйся, от рождения твоего благодатию Божиею покровенный;
радуйся, дни и нощи в молитвах проводивый.
Радуйся, красоту храмов Божиих возлюбивый;
радуйся, всего себе в послушание Богу предавый.
Радуйся, яко смотрением Божиим от стольнаго града в страну Астраханскую преселился еси;
радуйся, яко житие чудное тамо показал еси.
Радуйся, в недузех и болезнех терпение христианское явивый;
радуйся, благодатнаго видения ангела удостоенный.
Радуйся, яко облачение схимника от ангела узрел еси;
радуйся, яко равноангельное житие до конца возлюбил еси.
Радуйся, от лютаго недуга ангелом дивно исцеленный;
радуйся, ко иночеству благословением Божиим призванный.
Радуйся, преподобный отроче Боголепе, похвало земли нашея и чудотворче предивный.
Кондак 4
Буря недоумений смущаше родители твоя, како тебе, отроку еще юну телом и не доспевшу возраста совершенна, прииде желание монахом быти. Ты же, блаженне, Богом укрепленный, убедил еси их, яко един есть жребий твой на земли, прияти образ ангельский, и даст ти Господь исцеление от болезни при пострижении. Просвети и наша сердца, мраком житейских попечений омраченная, и научи нас познавати волю Божию, воспевающе Ему купно с тобою песнь: Аллилуиа.
Икос 4
Слыша старец Божий глас с небесе: «Остави келию свою и иди во град Черный Яр; тамо обрящеши отрока Бориса и послужиши ему». Темже вниде в дом воеводы, родителя твоего, блаженне, идеже уразуме тя сосуд избран Божия благодати, возлюби тя и рече, яко повеле Господь совершити пострижение отрока Бориса в схиму. Мы же, дивящеся таковому о тебе Божию смотрению, воспеваем ти:
Радуйся, яко от млада возраста иночества возжелел еси;
радуйся, яко Господь желание твое исполни.
Радуйся, мысль твою в Бозе утвердивый;
радуйся, сердце твое воли Божией всецело покоривый.
Радуйся, яко терпением болезней с многострадальным иовом сравнился еси;
радуйся, яко болезньми многими здравие души стяжал еси.
Радуйся, плоть свою духови покоривый;
радуйся, мир и благая его презревый.
Радуйся, святых заповедей Божиих блюстителю верный;
радуйся, чистоты сердечныя сокровище.
Радуйся, Господа ради путь тесный и скорбный избравый;
радуйся, любовию ко Христу пламеневый.
Радуйся, преподобный отроче Боголепе, похвало земли нашея и чудотворче предивный.
Кондак 5
Боготечней звезде подобен был еси во граде своем, преподобне, егда старец Божий постриже тя в схиму с именем Боголеп, сиречь украшенный Богом. Ты же на Христа единаго присно взирал еси умныма очима души твоея и Его заповеди святыя имел еси пред собою яко светильник, сердцем и усты воспевая Ему: Аллилуиа.
Икос 5
Видеша людие града твоего Божие к тебе милосердие и благоволение, преподобне, и возрадовашася, благодаряще Господа о исцелении твоем. Ты же три дни и три нощи коленопреклонен молился еси в олтаре и рекл еси родителем: «Отныне аз есмь не ваш, а Божий; Господь укрепит вас, возлюбленнии мои родителие, вы не будете скорбети мене ради, ибо даст вам Господь еще детей и вы утешитеся ими». Темже мы, сбытие словес твоих зряще, благодарными гласы взываем тако:
Радуйся, Божиим смотрением иноческий постриг получивый;
радуйся, от руку старца дивнаго в схиму святую облеченный.
Радуйся, Боголеп, сиречь украшенный Богом, от него нареченный;
радуйся, ко спасению вечному им направленный.
Радуйся, яко схиму приняв, от недуга исцелился еси;
радуйся, яко по исцелении единому Богу служити возжелел еси.
Радуйся, благодатию Духа Святаго просвещенный;
радуйся, образом ангельским достойне почтенный.
Радуйся, яко земная отринув, небесная возлюбил еси;
радуйся, яко о тебе ангельския силы радовахуся.
Радуйся, благоговейное отроча, снискавшее дары страха Божия и благочестия;
радуйся, неувядаемый цвете ангельския чистоты.
Радуйся, преподобный отроче Боголепе, похвало земли нашея и чудотворче предивный.
Кондак 6
Проповедник силы и славы Божия явился еси, преподобне Боголепе, егда обратился еси к жителем града твоего глаголя: «Господь постави мя вашим заступником; вся, яже попросите мя в молитвах, исполнятся; отныне аз есмь хранитель града вашего и молитвенник о земле Русской». Сказав сия, преподобне, к Богу преставился еси и в вечное Царство Его вселился еси, воспевая серафимскую песнь: Аллилуиа.
Икос 6
Возсия на месте погребения твоего благодать велия, чудотворяща преславная исцеления недужным, с верою приходящим ко гробу твоему. Ты бо милостию Божиею приял еси дар лукавыя духи прогоняти, недужныя исцеляти, слепым очи отверзати. Не остави и нас грешных, но даруй нам душевное спасение, телесное здравие и помощь неослабну, да тя величаем тако:
Радуйся, свято и преподобно жизнь земную скончавый;
радуйся, веру, надежду и любовь до конца сохранивый.
Радуйся, дух твой с радостию Богу предавый;
радуйся, праведною кончиною святость жития твоего показавый.
Радуйся, яко тебе, земному страдальцу, райский покой дарова Господь;
радуйся, яко по кончине у гробницы твоей множество верных собрал еси.
Радуйся, преселивыйся от земли к обителем небесным;
радуйся, яко тамо со святыми наслаждаешися блаженства вечнаго.
Радуйся, в неизреченную радость Господа своего вшедый;
радуйся, венец безсмертныя жизни приявый.
Радуйся, по преставлении потоки чудес от гроба твоего явивый;
радуйся, дерзновение велие ко Господу стяжавый.
Радуйся, преподобный отроче Боголепе, похвало земли нашея и чудотворче предивный.
Кондак 7
Хотяй человеколюбец Господь явити тя заступника земли Русския, молитвою твоею многажды соблюдаше град твой и люди от нападения агарян. Ты бо являлся еси на стенах в схиме и устрашал еси врагов Православия прещением грозным, глаголя: «Грядите, окаяннии, вон; Бог постави мя стражем месту сему, и аще дерзнете на град сей, злою смертию погибнете». Враждебныя же рати вскоре со студом отступаху от града, не могуще его победити. Темже людие православнии воздвигоша часовню над гробом твоим, благодарственно прославляюще Бога, даровавшаго им защитника благодатнаго, и вопияху Ему: Аллилуиа.
Икос 7
Новое и преславное чудо показа нам тобою всех чудес Творец и Владыка, егда изограф иерей Иоанн в соннем видении услыша глас, повелевающ написати образ твой, преподобне Боголепе, и в часовне над гробом поставити. Исполнив сия, исцелися изограф от болезни глаз. С того времене прославися имя отрока святаго по всей Русстей земли и вси людие православнии, пред иконою твоею молящеся, воспеваху тебе тако:
Радуйся, яко и по кончине твоей с нами невидимо пребываеши;
радуйся, яко пределы отечества нашего неусыпно защищаеши.
Радуйся, град твой Черный Яр от нашествия агарянскаго многажды избавляяй;
радуйся, лютость врагов Православия силою благодати Божия укротивый.
Радуйся, христолюбивому воинству помощниче крепкий;
радуйся, агарянских полчищ страх и поражение.
Радуйся, поборниче крепкий за державу Российскую;
радуйся, добропобедный воине Православныя Церкве.
Радуйся, изографу, образ твой написавшему, исцеление даровавый;
радуйся, множество верных пред святым твоим образом собравый.
Радуйся, отечеству нашему щит и ограждение;
радуйся, молитвенниче крепкий за Русь Православную.
Радуйся, преподобный отроче Боголепе, похвало земли нашея и чудотворче предивный.
Кондак 8
Странно и страшно видети, како враг спасения, хотя скорбь людем православным сотворити, вооружи на гробницу твою, преподобне Боголепе, гнев царя Петра Великаго, иже повеле часовню и гробницу твою разорити. Обаче молитва твоя, преподобне, невидимо охраняше град Черный Яр, соблюдающи почитающих тя от болезни и смерти, егда смертоносная язва многи люди окрест живущия погубляше. Темже вси вернии, благодарно тя славяще, Богу, тя прославльшему, воспеваху песнь: Аллилуиа.
Икос 8
Всякаго чина и звания людие страны Астраханския, чтущии память твою, по кончине царя Петра, егда сгоре древняя церковь во граде твоем, восхотеша устроити новый храм на месте погребения честных мощей твоих. Егоже соорудивше и освятивше, вси вернии в радости велицей прославиша в нем тя, отроче святый, тако:
Радуйся, святости и чистоты крине благоуханный;
радуйся, яко нетлением тело твое прослави Господь.
Радуйся, угодниче Божий, на Небеси и на земли прославленный;
радуйся, яко о нас грешных мольбы Богу приносиши.
Радуйся, росо, души верных услаждающая;
радуйся, чаше, изливающая токи милосердия.
Радуйся, поношение и клевету по кончине твоей претерпевый;
радуйся, гроб твой всем притекающим к нему верным врачебницу недугов показавый.
Радуйся, защитниче неправедно осужденных;
радуйся, во искушениих милостивый наш заступниче.
Радуйся, златая лампадо, во умилостивление Праведнаго Судии возжженная;
радуйся, утешение всем требующим твоея помощи.
Радуйся, преподобный отроче Боголепе, похвало земли нашея и чудотворче предивный.
Кондак 9
Всяк возраст и весь народ града твоего плакаша горце, егда устремление потока воднаго, на святый храм движущееся, цельбоносный гроб твой в воды волжския погрузи. Обаче вси людие верующе, яко воля Божия совершается, и не оставит святый отрок Боголеп любящих и чтущих имя его, в покаянии взываху Царю Славы Христу Богу: Аллилуиа.
Икос 9
Ветий многовещанных паче глас народный славит тя, блаженне, ибо воистину превосходит похвалу человеческую житие твое, емуже изумляются людие православнии, и ангели небеснии с тобою ныне ликовствуют. Сего ради мы, любовию к тебе побеждаеми, дерзаем ублажати тя пением таковым:
Радуйся, яко присно со ангелы на Небеси обитаеши;
радуйся, яко даровася тебе от Господа прославление.
Радуйся, дивный Христов угодниче;
радуйся, защитниче наш и покровителю.
Радуйся, воды волжския мощами твоими освятивый;
радуйся, стране Астраханстей и всему отечеству нашему многоценное украшение.
Радуйся, любящим тя святою любовию воздаваяй;
радуйся, во истинней вере нас утверждаяй.
Радуйся, Божественный врачу, всякия болезни и недуги исцеляяй;
радуйся, всещедрый и милостивый наш предстателю.
Радуйся, дерзновение велие ко Господу стяжавый;
радуйся, цвете благоуханный земли нашея.
Радуйся, преподобный отроче Боголепе, похвало земли нашея и чудотворче предивный.
Кондак 10
Спасти хотя душу твою, преподобне, единому Богу возжелал еси работати по слову Господа: «Оставите детей приходити ко Мне, и иже аще не приимет Царствия Божия яко отроча, не имать внити в не». Помози убо нам подражати тебе непрестанно, даруй нам чистую детскую веру и молитву, научи желати единаго на потребу, еже есть богоугождение, да сподобимся вкупе с тобою, яко вернии раби Владыки Христа, воспевати Ему хвалебную песнь: Аллилуиа.
Икос 10
Стену необориму и ограждение не токмо граду твоему и стране Астраханстей, но и всем людем российским дарова тя Господь, преподобне, ибо благоприятными твоими молитвами отечество наше от нахождения иноплеменных заступаеши и православныя люди от пленения агарян свобождаеши. Темже поминающе, яко еще отцы наши издревле научишася почитати тя заступника в бедах и чудотворца, тако и мы приносим тебе похвалы сия:
Радуйся, купца, в плену агарянском сущаго, явлением твоим возвеселивый;
радуйся, в день Пасхи Христовы того из плена свободивый.
Радуйся, яко в сониих и видениих верных посещаеши;
радуйся, яко в бедах и напастех им на помощь ускоряеши.
Радуйся, яко слепым прозрение даруеши;
радуйся, яко глухим слух отверзаеши.
Радуйся, разслабленным благодатное укрепление;
радуйся, безнадежных страдальцев Божественный целителю.
Радуйся, младенцев небесный покровителю;
радуйся, матерей, скорбящих о чадех усопших, скорый утешителю.
Радуйся, ревнующим о спасении помощниче богодарованный;
радуйся, яко всем полезная у Бога просиши.
Радуйся, преподобный отроче Боголепе, похвало земли нашея и чудотворче предивный.
Кондак 11
Пение всеумиленное приносят тебе, преподобне, людие страны Астраханския, прославляюще дивное видение, егда узре жена благочестивая Пречистую Матерь Господа с отроком преподобным Боголепом на водах волжских стоящих и о людех земли нашея молящихся. Сему видению последуя, написан бысть образ Пресвятыя Богородицы, Волжския наименован, на негоже взирающе, в скорбех отраду, в недузех врачевство обильно приемлем и зовем гласы хвалебными Богу, даровавшему нам благодать сию: Аллилуиа.
Икос 11
Светозарная звезда явился еси в стране Астраханстей, преподобне Боголепе, научая верных шествовати к Свету мира, Христу Богу нашему, и благодатно просвещаеши всю страну Российскую, в нейже яко угодника Божия усердно тя прославляет Церковь Христова. Не лиши нас грешных твоея помощи и покрова молитв твоих, во умилениии воспевающих ти таковая:
Радуйся, светильниче духовный, освящаяй верным путь спасения;
радуйся, яко и нас благодатным светом просвещаеши.
Радуйся, свеще, Божественным пламенем возжженная;
радуйся, звездо небосветлая, от страны Астраханския возсиявшая.
Радуйся, Божественныя благодати светило;
радуйся, к Богородице молитвенниче наш неусыпный.
Радуйся, со Пресвятою Богородицею на водах Волги стоявый;
радуйся, по водам плавающим добрый кормчий.
Радуйся, дивную икону Волжския Богоматере чтущим тя даровавый;
радуйся, яко иконою тою чудеса содеваются.
Радуйся, Богородицу нам указавый от всех бед и печалей избавление;
радуйся, яко милостию Ея ты еси наша радость и утешение.
Радуйся, преподобный отроче Боголепе, похвало земли нашея и чудотворче предивный.
Кондак 12
Благодать приял еси от всещедраго Бога, святе Боголепе, недуги и язи человеческия врачевати преславно. Темже ведуще тя яко целителя, утешителя и помощника от Господа нам дарованнаго, молитвенно торжествующе святую память твою, к тебе прибегаем и по прошению дарованная благодеяния приемлем, поюще Богу песнь: Аллилуиа.
Икос 12
Поюще преславное о тебе смотрение Божие и чудеса твоя, преподобне Боголепе, чтим святую память твою, яко небеснаго предстателя и помощника; веруем, яко Господь молитвами твоими вся просимая нам дарует, и молим тя усердно, не забуди нас, но всегда пребывай с нами, да твоим заступлением и помощию ограждаеми, спасаеми и избавляеми от всех зол видимых и невидимых, вопием ти сице:
Радуйся, от рождения твоего Богом избранный;
радуйся, избрание твое подвигом жизни оправдавый.
Радуйся, подвижническаго венца от младенчества возжелевый;
радуйся, яко сподобился еси быти причастник славы вечныя.
Радуйся, яко с ангельскими лики на Небеси Творца славословиши;
радуйся, яко со пророки и апостолы веселишися.
Радуйся, яко со избранными Его во обителех райских торжествуеши;
радуйся, яко неизреченную славу Господню созерцаеши.
Радуйся, всех преподобных земли нашея сподвижниче;
радуйся, яко имя твое ныне по всей стране нашей прославляется.
Радуйся, отечества твоего земнаго покровителю небесный;
радуйся, по Бозе и Богородице крепкое наше упование.
Радуйся, преподобный отроче Боголепе, похвало земли нашея и чудотворче предивный.
Кондак 13
О преславный чудотворче и угодниче Христов, отроче святый Боголепе, приими сие малое с любовию ти приносимое хваление и со Пресвятою Владычицею и всеми святыми земли нашея молися Господу Иисусу Христу, да избавит нас от всяких бед и скорбей, от враг видимых и невидимых, от напрасныя смерти и будущих мук и сподобит нас со избранными Своими воспевати Ему во веки веков ангельскую песнь: Аллилуиа.
Этот кондак читается трижды, затем 1-й икос: «Ангельское твое житие…» и 1-й кондак: «Избранный от юности своея…»
МОЛИТВА
О всехвальный и предивный угодниче Христов, преподобный отроче Боголепе, страны нашея драгоценное сокровище, ты бо любве ради Божия издетска работати Господеви возжелал еси и, яко ангел во плоти пожив на земли, чистою душею твоею в небесных обителех водворился еси, ныне же с лики святых Богу предстоиши и Тому хвалы и славословия непрестанно приносиши. К тебе прибегаем, многострадальный угодниче Божий, яко сострадати нам могущему и велие дерзновение ко Христу Богу стяжавшему, скорому помощнику всем к тебе прибегающим и молящимся пред святым твоим образом. Услыши моление нас грешных, чтущих святую память твою, и якоже древле град твой и людей православных многажды от пленения и разорения агарянскаго дивно избавлял еси, тако и ныне нас и вся грады и веси страны Российския от всяких бед и напастей, от нашествий иноплеменных и междоусобныя брани предстательством твоим сохрани и от врагов видимых и невидимых защити. Буди помощник благий всем чтущим тя и избави нас от глада и смертоносныя язвы, от потопления и огня, от напрасныя смерти и от всякаго зла. Моли Всесвятаго Божественнаго Духа, да возсияет свет истины братиям нашим не верующим в Него, и да познают они Христа Бога истиннаго, единаго Спасителя всех человек, да вразумятся они и прейдут во ограду Православныя Церкве, в нейже единой несомненно содевается спасение верных. Призри милостиво на нас и вся прошения наша исполни: болящим исцеление, скорбящим утешение, бедствующим вспоможение скорое подаждь, плавающих по водам управи, волнения моря житейскаго утиши; укрепи нас к исполнению заповедей Господних, даждь нам покаяние сердечное и умиление, молитву непрестанную, хранение сердца, мир помыслов, чистоту желаний, утверди сердца наша во смирении, кротости, терпении и любви, помози всем верным соединитися союзом любве неразделимыя, да в мире друг друга тяготы носяще, достигнем Царства Небеснаго, идеже вкупе с тобою и всеми святыми прославим милосердие и любовь Спасителя нашего Господа Иисуса Христа, Сына Божия, со Безначальным Его Отцем и Пресвятым Духом во веки веков. Аминь.
ПРЕПОДОБНОМУ ОТРОКУ БОГОЛЕПУ
Тропарь, глас 4:
От юности посвящен быв Господеви, / преподобне отче Боголепе, / мира сего красоту оставил еси, / желая древнему отечеству наследовати, / сохраняй град сей и люди, / с верою к тебе притекающия, / просяще помощи и заступления, / да вси воспоим ти: // радуйся, отче Боголепе.
Кондак, глас 3:
Изволил еси Господеви от юности работати, отче Боголепе, / Крест Христов на рамо взем и понес, / молися Пресвятей Троице / о верою просящих в скорбех исцелений / и в напастех свобождений, // всея Российския земли похвало и утверждение.
ЖИТИЕ ПРЕПОДОБНОГО БОГОЛЕПА ЧЕРНОЯРСКОГО
©Акафист составлен А. Трофимовым
Спаси вас Господи ! Мiра вам духовного в сии предрождественскии дни . Я видел сей образ преподобного отрока Боголепа Черноярского ( Ушакова ) .