Акафисты

АКАФИСТ ПРЕПОДОБНОМУ АНТОНИЮ ДЫМСКОМУ

Кондак 1

Избранный воине Христов, обители Дымския устроителю и наставниче монахов богомудрый, преподобне отче Антоние, восхваляем тя с любовию в песнех духовных, яко победителя мирских соблазнов, плотских похотей и ухищрений диавольских и скораго недугов душевных же и телесных целителя. Ты же, яко имеяй дерзновение ко Господу, от всяких нас зол и обстояний свобождай, да зовем ти:
Радуйся, преподобне Антоние, земли Тихвинския молитвенниче и преславный чудотворче.

Икос 1

Ангельское житие возлюбив от юности своея, преподобне отче Антоние, дивный образ был еси добродетелей христианских, и ангелу Божию подобен был еси чистотою сердца, незлобием и светлостию ума твоего. Темже избра тя Господь к подвигом иноческим и яви Церкви Своей великаго подвижника и чудотворца, наставника инокам сильнаго словом и делом, имущаго к Нему дерзновение молити о избавлении нас от всех бед и скорбей. Сего ради восхваляем тя сице:
Радуйся, родителей благочестивых чадо благословенное;
радуйся, Великаго Новаграда светильниче пресветлый.
Радуйся, во обители Хутынстей пристанище спасения обретый;
радуйся, мужественно благое иго Христово на себе возложивый.
Радуйся, единаго Господа всем сердцем возлюбивый;
радуйся, сосуде, Божия благодати преисполненный.
Радуйся, пустынножителей славо и похвало;
радуйся, земли Тихвинския духовное просвещение.
Радуйся, обители Дымския первоначальниче и устроителю;
радуйся, земный ангеле и человече небесный.
Радуйся, к великим преподобным отцем Православия сопричтенный;
радуйся, яко Престолу Царя Славы ныне предстоиши.
Радуйся, преподобне Антоние, земли Тихвинския молитвенниче и преславный чудотворче.

Кондак 2

Видя Господь чистоту сердца твоего, от юности к исканию единаго на потребу направи твой помысл, преподобне. Ты же, аще и млад быв, обаче силу словес Христовых: «аще кто хощет по Мне ити, да отвержется себе, и возмет крест свой, и последует Ми» уразумел еси, и Тому невозвратно последовал еси. Темже любве ради Христовы, родителей твоих и дом отеческий оставил еси, всякаго мирскаго пристрастия свободився, и водворился еси с работающими в иночестем чине, во еже непреткновенно воспевати Богу песнь: Аллилуиа.

Икос 2

Разумом богопросвещенным разумел еси, отче преподобне, яко едино есть на потребу человеком, еже благоугодити Господеви. Сего ради возлюбив добродетельное житие и во всем упование возложив на Бога, удалился еси во обитель Хутынскую ко преподобному Варлааму и был еси добрый ученик великаго учителя монашества, воистинну достойный благохвалений таковых:
Радуйся, от юности твоея веру непоколебиму стяжавый;
радуйся, девства и целомудрия усердный хранителю.
Радуйся, родителей и дом свой Христа ради оставивый;
радуйся, богатство и славу возненавидевый.
Радуйся, всякое житейское попечение отложивый;
радуйся, во обитель Хутынскую на подвиги иноческия пришедый,
Радуйся, богоноснаго Варлаама верный учениче и друже;
радуйся, житию того усердный подражателю.
Радуйся, любовь велию о Господе к нему стяжавый;
радуйся, наставником твоим возлюбленный.
Радуйся, от рук преподобнаго Варлаама крест подвижническаго жития приявый;
радуйся, совершенное послушание духовному отцу своему явивый.
Радуйся, преподобне Антоние, земли Тихвинския молитвенниче и преславный чудотворче.

Кондак 3

Силою Вышняго укрепляемый, отче преподобне, мнози подвиги и труды во обители подъял еси, ибо вложи Господь в сердце твое к иноческому житию великую ревность. Преподобный же Варлаам, прозорливыма очима провидя в тебе сосуд избран Духа Святаго, уставу монашескому тя настави и в а!нгельский образ облече с именем в память Великаго Антония. Ты же, радуяся сему, не преставал еси сердцем и усты воспевати Богу благодарственную песнь: Аллилуиа.

Икос 3

Имея в сердце твоем твердое упование на всесильную помощь Божию, в стенах обители Хутынския тихое пристанище спасения обрел еси, труды к трудом прилагая, в молитвенных бдениих, пощениих, по степенем добродетелей восходя к совершенству духовному. Темже убо послушание истинное учителю твоему Варлааму стяжав и добродетелем его поревновав, в туюжде меру возраста достигл еси и достоин явился еси ему преемник. Мы же грешнии вопием ти: моли Бога о нас с преподобным Варлаамом, да возможем явити, якоже и ты, образ послушания и смирения и с любовию взывати ти сице:
Радуйся, союзом любве с блаженным Варлаамом себе связавый;
радуйся, от наставника своего словесы мудрости напитавыйся.
Радуйся, без воли и благословения учителя твоего ничесоже творивый;
радуйся, от руки его лику иноческому приобщивыйся.
Радуйся, отцу монашества преподобному Антонию Великому тезоименитый;
радуйся, яко житию его поревновал еси.
Радуйся, благодатию Божиею просвещенный;
радуйся, дарованный тебе талант умноживый.
Радуйся, Божественнаго смирения и терпения подражателю;
радуйся, заповедей Господних верный блюстителю.
Радуйся, иноческаго жития скорби и тесноту возлюбивый;
радуйся, святых преданий отеческих хранителю.
Радуйся, преподобне Антоние, земли Тихвинския молитвенниче и преславный чудотворче.

Кондак 4

Буря искушений и страхований диавольских не возможе поколебати храмины твоея душевныя, преподобне отче Антоние, осно!вана бо бе на твердом камени веры во Христа, и хранима трезвением и молитвами, имиже побеждал еси врага спасения рода человеческаго и восходил еси от силы в силу к совершенству духовному в меру возраста Христова, воспевая Ему: Аллилуиа.

Икос 4

Слышав игумен Варлаам повеление архиепископа Новаграда избрати инока обители яко посланника ко Вселенскому Патриарху в Царьград, призва тя, отче Антоние, и благослови, да идеши с миром Ты же, отче, не устрашился еси долготы и тяготы пути сего, и вся повеленная тебе исполнивши, во Святую Землю странствие совершил еси, идеже Гробу Господню поклонился еси и мнози обители Палестины посетил еси. Мы же, воспоминая послушание твое, благословением Божиим осененное, воспеваем ти сице:
Радуйся, в волю Божию всего себе предавый;
радуйся, смирения святаго преисполненный.
Радуйся, волю архиепископа Новаграда и игумена Варлаама безпрекословно исполнивый;
радуйся, вся скорби многотруднаго пути благодушно подъявый.
Радуйся, от Вселенскаго Патриарха любовию о Христе почтенный;
радуйся, благословение того в землю Русскую принесый.
Радуйся, Святую Землю посетивый;
радуйся, Гробу Господню во Иерусалиме поклонивыйся.
Радуйся, странствие воистинну душеполезное совершивый;
радуйся, странниче богомудрый и послушливый.
Радуйся, в послушаниих твоих никогдаже возроптавый;
радуйся, образ Божий в души твоей хранивый.
Радуйся, преподобне Антоние, земли Тихвинския молитвенниче и преславный чудотворче.

Кондак 5

Боготечней звезде подобен был еси, блаженне Антоние, егда возвратился еси из Царьграда и услышал еси словеса преподобнаго Варлаама братии, собравшейся у одра наставника и духовнаго отца своего: «Се уже, братие, конец жития моего приближися и отхожу от мира сего. Вас же предаю в руце Божии. Наставник же ваш в мое место да будет Антоний, сверстник мой». Темже уразумевая совершения благия воли Господни на тебе, отче Антоние, вся братия воспела еси Богу песнь хваления и благодарения: Аллилуиа.

Икос 5

Видевше тя иноцы обители Хутынския яко великаго благочестия подвижника, возрадовашася приятием тобою игуменства, егоже приемь, дивен настоятель был еси, добре управляя обителию, ко всем нелицемерную любовь являюще, и братию твою назидал еси к подвигом постническим и во всяком доброделании, да будут совершенны и непорочны и да возносят немолчно хвалы Христу Богу. Тии же, в любви Божии укрепляющеся, пояху тебе таковая:
Радуйся, цвете благоуханный, процветый во обители дивнаго Варлаама;
радуйся, благословение отца твоего духовнаго на игуменство приемый.
Радуйся, преподобнаго игумена Варлаама достойный преемниче;
радуйся, любве учителя твоего к братии подражателю.
Радуйся, кросото и утешение иноков Хутынския обители;
радуйся, явивый братии образ кротости и смиренномудрия.
Радуйся, яко немощи немощных братий терпеливо понесл еси;
радуйся, яко спасению многих послужил еси.
Радуйся, верный путеводителю шествующих ко Господу тесным путем иноческаго жития;
радуйся, добрый наставниче подвизающимся во брани духовней.
Радуйся, братолюбия христианскаго истинный ревнителю;
радуйся, лествице, возводящая иноков на высоту духовнаго совершенства.
Радуйся, преподобне Антоние, земли Тихвинския молитвенниче и преславный чудотворче.

Кондак 6

Проповедник пустыннаго монашескаго жития явился еси, преподобне Антоние, егда Духом Божиим направляем, обитель Хутынскую оставил еси и сквозе непроходныя дебри пришел еси ко езеру Дымскому, идеже обрет место красно, от Бога тебе указанное, первее ископа себе малую келлию и живяше тамо, пустынное безмолвие огласив пением: Аллилуиа.

Икос 6

Возсияв от Новаградския земли, преподобне отче наш Антоние, просветил еси чудным светом пустыню тихвинскую. Тогда сбыстся о тебе слово Господне: «Не может град укрытися верху горы стоя», яви бо тя Христос наставника мудра и учителя иноком пустыннолюбивым, иже стекахуся к тебе, яко овцы к пастырю, могущу упасти их ко спасению и жизни вечней. Темже и мы благодаряще Господа, даровавшаго ти таковую благодать, воспеваем тя сице:
Радуйся, обитель Хутынскую послушания ради Господу оставивый;
радуйся, от почестей земных в пустыню сокрывыйся.
Радуйся, промышлением Божиим в дебри тихвинския приведенный;
радуйся, пустынныя лишения доблественне претерпевый.
Радуйся, пророкам Божиим Илии и Иоанну Предтече пустыннолюбивый подражателю;
радуйся, истиннаго духа пустынножительства наставниче.
Радуйся, безмолвныя дебри благоуханием молитв твоих наполнивый;
радуйся, пустынное место в благоплодный вертоград Христов преобразивый.
Радуйся, в напастех и искушениих терпение и упование сохранивый;
радуйся, яко дарова тебе Господь место покоя духовнаго.
Радуйся, в иноческих трудех неустанный подвижниче;
радуйся, из глубины пустыни светивый миру.
Радуйся, преподобне Антоние, земли Тихвинския молитвенниче и преславный чудотворче.

Кондак 7

Хотение имел еси, блаженне Антоние, еже в безмолвии ненарушимом Господеви поработати. Сего ради обретши камень велик посреде езера Дымскаго, во дни и нощи непрестанно на камени сем пребывал еси, воздевая руце твои горе, и молился еси Христу Богу и Пречистей Его Матери, вражии искушения побеждая и воспевая в радости духовней ангельскую песнь: Аллилуиа.

Икос 7

Новаго тя Антония Велакаго, наставника иноков ко спасению яви Христос в стране Российстей; ты бо земли севера духовно облистал еси, яко един от первоначальник Фиваиды Русския, и слава твоих добродетелей достиже многих градов и весей земли нашея, подвизая ищущих спасения приходити к тебе. Тако о твоем пустыннем подвизе уведев, святой благоверный князь Александр Невский дарова ти грамоту на основание обители. Ты же, получивше благословение архиепископа Великаго Новаграда, начат обитель иноческую устрояти. Темже, угодниче Божий, ублажаем тя, взывающе сице:
Радуйся, блаженство пустынножития уразумевый;
радуйся, святое имя Господа Иисуса Христа в сердце и устех твоих всегда имевый.
Радуйся, на камени во езере Дымстем всенощныя молитвы и бдения усердно совершавый;
радуйся, руце твои со дерзновением к Богу воздевавый.
Радуйся, молитвою и бденным на столпе стоянием плоть свою укротивый;
радуйся, воды езера Дымскаго твоими молитвами и подвиги освятивый.
Радуйся, яко в водах сих благоверный князь Александр Невский от болезни исцелися;
радуйся, яко и доныне вернии исцеления зде улучают.
Радуйся, преподобных отец Диниила и Симеона Столпников ревнителю;
радуйся, первый российский столпниче на водах явивыйся.
Радуйся, собравый лик ученик, тебе единонравных;
радуйся, при езере Дымстем обитель иноческую устроивый.
Радуйся, преподобне Антоние, земли Тихвинския молитвенниче и преславный чудотворче.

Кондак 8

Странника и пришельца помышляя себе быти в мире сем, преподобне отче Антоние, покров странником создал еси, устроивше обитель святую, яко крин в пустыне тихвинстей процветшую, в нейже и храмы во имя преподобнаго Антония Великаго и Предтечи Господня Иоанна соорудив и освятив, и келлии соградив, уставом общежительным житие братии утвердил еси, научая достойно и праведно воспевати Богу ангельскую песнь: Аллилуиа.

Икос 8

Всею душею послужив Господу и всем житием своим благоугодив Ему, плоть твою духови покорил еси, множество вериг железных на ся возложив; воздержанием же и терпением прилоги страстей умертвив, посрамил еси врага и всю его гордыню и дарованное тебе стадо упасл еси, любовь нелицемерную к братиям являя. Темже вся страна Тихвинская светом твоих подвигов и молитв осияваема, прослави о тебе Господа, и яко воистинну ангела земнаго и человека небеснаго тя ублажает и глаголет:
Радуйся, олтаря Господня непорочный служителю;
радуйся, таинств Божиих достойный совершителю.
Радуйся, житию и подвигом древних преподобных отец подражателю;
радуйся, правило иноческаго богоугоднаго жития.
Радуйся, еще при жизни даром чудес обогащенный;
радуйся, вериги железныя Христа ради на ся возложивый.
Радуйся, яко тобою воздвиг Господь в стране Тихвинстей дивную обитель;
радуйся, яко велию ревность при устроении обители сея явивый.
Радуйся, храмы Божии во обители твоей создавый;
радуйся, и себе самаго храм Триипостасному Богу сотворивый.
Радуйся, устава добраго общежития во обители твоей насадителю;
радуйся, любве и милосердия к братии исполненный.
Радуйся, преподобне Антоние, земли Тихвинския молитвенниче и преславный чудотворче.

Кондак 9

Всякое естество ангельское удивися преславней кончине твоей, преподобне отче Антоние, ты бо, духом провидя близкое твое от земли отшествие, завещал еси чадом твоим вся потребная ко спасению, дал еси им последнее целование и причастився Божественных и Животворящих Христовых Таин, предал еси святую твою душу в руце Божии, воспевая благодарственную песнь: Аллилуиа.

Икос 9

Ветии многовещанныя не возмогут по достоянию восхвалити пречудное прославление твое, егда во дни княжения благовернаго князя Димитрия Иоанновича Московскаго обретошася мощи твоя нетленны, ихже дарова Господь братии обители твоея во утешение, бедствующим в отраду и помощь, болящим во исцеление и во спасение всем, верою притекающим к тебе и с любовию вопиющим тако:
Радуйся, свято и богоугодно течение земное совершивый;
радуйся, мирно и радостно час кончины твоея сретивый.
Радуйся, братию твою простивый и благословивый;
радуйся, печаль братии о кончине твоей благодатно утешивый.
Радуйся, чадами твоими духовными со слезами погребенный;
радуйся, в храме преподобнаго Антония Великаго, тобою созданнем, положенный.
Радуйся, от обители земныя во обители Небесныя преселивыйся;
радуйся, яко тамо предстоя Царю Небесному, о братии обители твоея к Нему ходатайствуеши.
Радуйся, обретением мощей твоих обитель Дымскую духовне возвеселивый;
радуйся, мощами твоими святыми преславно в ней чудодействуяй.
Радуйся, яко рака твоя честная врачебница явися недугом человеческим;
радуйся, яко мощей твоих дуси злобы устрашаются.
Радуйся, преподобне Антоние, земли Тихвинския молитвенниче и преславный чудотворче.

Кондак 10

Спасти хотя землю Русскую от напастей и бед и даровати знамение благоволения к месту по!двигов твоих, преподобне отче Антоние, посла Господь людем русским безценное сокровище, егда благословением Пречистей Его Матери явися в пределех Тихвинских, яко солнце пресветлое, чудотворная икона Владычицы Богородицы Одигитрии, Путеводительницы ко спасению, лучами милости мир прсвещающая. Братия же обители твоея, угодниче Божий, с радостным трепетом прияша весть о чудном явлении, во умилении сердец вопия Богу: Аллилуиа.

Икос 10

Стена заступления быша молитва твоя, чудотворче святый, во дни нашествий иноплеменных, егда лютии агаряне разоряше грады и веси земли Русския, и во времена мятежей и нестроений в стране нашей. Тогда братия обители в страсе и трепете со слезами и пением изнесоша мощи твоя и положиша под спудом храма, егоже ты создал еси; обаче мощи твоя, аще и в недрех земных почивающии, яко сосуд благодати Божией избранный, источаша исцеления всем прибегающим к заступлению твоему и вопиющим тебе таковая:
Радуйся, яко Господа Иисуса Христа о всех чтущих тя умилостивляеши;
радуйся, яко и Преблагословенную Матерь Его ходатайствовати о нас грешных преклоняеши.
Радуйся, Заступницы Усердныя благоговейный почитателю;
радуйся, к Богородице молитвенниче наш неусыпный.
Радуйся, покровом Пресвятыя Богородицы осененный;
радуйся, яко благоволением Ея возвеличен еси.
Радуйся, земли Тихвинския духовное сокровище;
радуйся, яко имя твое по всей земли Русстей славится.
Радуйся, града Тихвина и обители твоея хранителю и заступниче;
радуйся, о мире земли нашея незримый ходатаю.
Радуйся, молитвенниче крепкий за Русь Православную;
радуйся, всея страны нашея Российския ограждение.
Радуйся, преподобне Антоние, земли Тихвинския молитвенниче и преславный чудотворче.

Кондак 11

Пение благодарственное людие православнии приносят тебе, преподобне отче Антоние, ибо обитель твоя, во дни гонений на веру Христову разоренная, ныне обновися, и возставися, и новыми храмы украсишася, в нюже мнози паломники благочестивии приходяще, с верою и любовию к заступлению твоему прибегают, яко к первоначальнику и покровителю места сего. Темже молим тя, угодниче Божий, не отступи духом своим от братии обители и от всех чтущих и любящих тя, но присно ограждай их от всяких бед молитвами твоими, подвизая воспевати Богу ангельскую песнь: Аллилуиа.

Икос 11

Светосиятельна тя светильника, многа лета сокрываема, не восхоте Господь оставити под спудом; тако мощи твоя, преподобне отче Антоние, обретены быша и со славою и псалмопением во обитель Успения Пресвятыя Богородицы на Тихвине принесошася, яко знамение милости Божия и благословения возрожденных обителей Тихвинския земли. И ныне, пред ракою мощей твоих предстояще, братия обители твоея вкупе со всеми любящими и чтущими тя воспевают хвалебныя песни таковыя:
Радуйся, обитель твою, от безбожных разоренную, возставивый;
радуйся, подвизающимся в ней учителю и богомудрый наставниче.
Радуйся, иноков ея благоговейных радование и утешение;
радуйся, всех притекающих во обитель покрове и заступление.
Радуйся, обретением мощей твоих Церковь Русскую радостию исполнивый;
радуйся, чудесы от них веру и благочестие в стране Российстей укрепивый.
Радуйся, приходящим на поклонение мощем твоим святым благий предстателю;
радуйся, чтущим память твою небесный покровителю.
Радуйся, светильниче Божия благодати, страну нашу духовно просветивый;
радуйся, от земных к небесным дух наш возвышаяй.
Радуйся, яко тобою Дом Пресвя!тыя Богородицы – град Тихвин хвалится;
радуйся, яко тебе ради и вся Российская земля веселится.
Радуйся, преподобне Антоние, земли Тихвинския молитвенниче и преславный чудотворче.

Кондак 12

Благодать велия возсия во всей богохранимей стране Российстей, егда смотрением Божиим возвратишася во град Тихвин чудотворная икона Владычицы нашея Богородицы, Тихвинскою именуемая, и поставлена быша в соборе Успения Божия Матере на столпе одесную раки мощей твоих, преподобне отче Антоние. Веруем, яко ныне ты, угодниче Божий, вкупе со всеми святыми земли Российския умоляеши Пречистую Матерь Господа о святей обители, утвержденной рукама твоима, и о всех людех страны нашея, да просветятся они светом веры истинныя, воспевая Спасителю благодарственную песнь Аллилуиа.

Икос 12

Поюще святое и равноангельное житие твое и прославляюще подвиги твоя, во умилении сердец славим, хвалим и величаем возвеличившаго тя Господа, даровавшаго ти благодать чудодействовати: от лет бо древних и до нынешняго дне вси призывающии тя и покланяющиися нетленным мощем твоим, неоскудную помощь получают: слепии прозирают, хромии ходят, разслабленнии возстают, беснующиися от насилия духов злобы свобождаются, недужнии от болезней и смертоносных ран исцеляются. Темже видяще при раце мощей твоих знамения и чудеса, сынове российстии с верою и любовию призывают тя и вопиют тебе сице:
Радуйся, славою и честию от Владыки своего Христа увенчанный;
радуйся, яко с Царицею Небесе и земли о нас молишися.
Радуйся, ангельских воинств собеседниче;
радуйся, патриархов и пророков спредстоятелю.
Радуйся, апостолов Христовых последователю;
радуйся, сияющая звездо в сонме преподобных.
Радуйся, яко со всеми святыми в Царствии Небеснем торжествуеши;
радуйся, обетований Христовых наследниче.
Радуйся, яко с горящим светильником вшел еси в радость Господа;
радуйся, Церкве Русския Православныя пресветлый светильниче.
Радуйся, яко о тебе радуются ангели на Небеси;
радуйся, яко о тебе Бога славят человецы на земли.
Радуйся, преподобне Антоние, земли Тихвинския молитвенниче и преславный чудотворче.

Кондак 13

О великий и преславный чудотворче, преподобне отче наш Антоние, всея земли Русския преславный чудотворче, приими сие малое моление наше, и благоприятным твоим ходатайством умоли Всемилостиваго Бога, да избавит нас от всех врагов видимых и невидимых, от всякия скорби и печали, от напрасныя смерти и будущия муки, и да сподобит вкупе с тобою и со всеми святыми во веки воспевати Спасителю нашему благодарственную песнь: Аллилуиа.

Этот кондак читается трижды, затем 1-й икос: «Ангельское житие возлюбив…» и 1-й кондак: «Избранный воине Христов…».

МОЛИТВА

О пастырю добрый, учителю и наставниче наш и святыя сея обители Дымския начальниче, преподобне отче Антоние! Молим тя усердно, яко имеющему дерзновение ко Владыце Христу и ко Пречистей Его Матери, буди о нас недостойных, во святей твоей обители живущих и о всех к раце мощей твоих отвсюду с верою притекающих, ходатай и молитвенник теплый, заступая нас от всяких бед и напастей, да твоими молитвами и предстательством пребудем невредимы от враг видимых и невидимых. Моли милосердие Божие, да спасет нас от прегерешений наших, имиже весть судьбами. Моли благость Его, еже милостивно обители сей и всему миру потребная подавати. Молися дающему всем мир всякому верному в доме и на пути и повсюду дни благи и безмятежны даровати, жизнь нашу умирити, и вся люди помиловати, якоже зде предстоящия, тако и благословною виною отшедшия отцы и братию нашу, и спасти души наша, да непрестанно славим, хвалим, поем и величаем пречестное и великолепое имя Отца и Сына и Святаго Духа, ныне и присно, и во веки веков. Аминь.

МОЛИТВА ЧТОМАЯ ВО ОБИТЕЛИ ПРЕПОДОБНАГО АНТОНИЯ ДЫМСКАГО ПРЕД ЕГО СВЯТЫМИ МОЩАМИ

О преподобне и богоносне отче наш Антоние, иноческаго жития в пустынней сей обители богоизбранный начальниче и основателю! Молим тя мы, смиреннии и недостойнии, еже сохранити место селения твоего, святую обитель Дымскую, идеже духом любве твоея неотступно пребываеши; помози всем зде подвизающимся уставы преподобных отец непоколебимы сохранити, избави от падений греховных, даруй нам дух сокрушения и смирения, настави на исполнение обетов иноческих и всех заповедей Божиих, и никогда не отступай от нас. Моли Господа, да ниспослет нам тихое и богоугодное житие, да уврачует Своею благодатию наша болезни душевныя и телесныя, согреет наша сердца любовию друг ко другу и сохранит нас от стрел вражиих, и всякия прелести бесовския и козней диавольских, да не оскудеет вера в нас грешных и да осенит благословением Своим строителей, благотворителей и благоукрасителей обители сея.
Не забуди, чудотворче святый, присещати град Тихвин и святыя обители его Успенскую и Введенскую, сохраняя их и соблюдая твоими молитвами от всякаго зла, да не отступит от места сего Покров и затупление Пресвятыя Владычицы нашея Богородицы, и да не оскудеют никогда истиннии ревнители иноческаго жития в обителех сих, да на месте сем, в мире и радости благочестно славится пресвятое имя Господа нашего и обретают вечное спасение ищущии Его.
Помяни, отче святый, и всех, веру и любовь к тебе имущих, имя твое молитвенно призывающих и на поклонение мощем твоим приходящих, и вся во благих прошения их милостиво исполни; утверди в нас память смертную, да и мы в покаянии и чистым сердцем представше ко Господу, сподобимся внити в Царствие Божие, идеже вкупе с тобою и всеми святыми прославим дивнаго во святых Своих Бога нашего, Отца, и Сына, и Святаго Духа во веки веков. Аминь.

ПРЕПОДОБНОМУ АНТОНИЮ ДЫМСКОМУ

Тропарь, глас 4:

Добродетелей ревнителю,/ пустынный житель,/ подвижниче веры Христа Бога нашего,/ пощением и труды умертвивый плотская вожделения,/ тезоимените великому Антонию,/ егоже житию поревновал еси/ и во егоже имя Божественный храм воздвигл еси./ Купно с ним, преподобне Антоние, моли Спасителя всех,/ да и нас сотворит победители плотских похотей/ и храмы Духа Святаго,/ по велицей Его милости.

Кондак, глас 6:

Сверстник и подражатель преподобному Варлааму,/ послушание к нему истинное стяжав,/ достоин явися ему преемник,/ упасши до времене стадо его,/ добродетелем же его поревновав,/ в туюжде меру возраста достигл еси,/ безмолвие пустынное возлюбив,/ и угоден Господеви показался еси,/ первоначальник быв пустыни при езере Дымском,/ тем ти вопием: с преподобным Варлаамом, отче Антоние, моли о нас Бога,/ да даст нам такожде угодити Ему, якоже и ты,/ образе послушания и безмолвия тихий рачителю.

ЖИТИЕ ПРЕПОДОБНОГО АНТОНИЯ ДЫМСКОГО

Добавить комментарий

Нажмите здесь, чтобы оставить комментарий

Ваш e-mail не будет опубликован.

ПАМЯТНЫЕ ДАТЫ

ПАМЯТНЫЕ ДАТЫ

ПАМЯТНЫЕ ДАТЫ

25 ИЮЛЯ - СВЯТОЙ МУЧЕНИЦЫ МАРИИ ГОЛИНДУХИ
СВ. МУЧЕНИЦА МАРИЯ ГОЛИНДУХА. СОВРЕМЕННАЯ ИКОНА
СТРАДАНИЕ СВЯТОЙ МУЧЕНИЦЫ МАРИИ-ГОЛИНДУХИ. ЧИТАТЬ ДАЛЕЕ...

ПАМЯТНЫЕ ДАТЫ

23 ИЮЛЯ - ДЕНЬ АНГЕЛА СХИМОНАХИНИ АНТОНИИ (КАВЕШНИКОВОЙ)
СХИМОНАХИНЯ АНТОНИЯ
В этот день отмечается день Ангела схимонахини Антонии (Кавешниковой) – православной подвижницы, исповедницы и старицы века ушедшего. В 2002 году в свет вышла составленная мною книга с ее жизнеописанием – «Я испытал тебя в горниле страдания» (Ис. 48,10). Схимонахиня Антония (Анастасия Яковлевна Кавешникова). В 2003–2006 годы последовали четыре переиздания книги, в том числе – три на Украине.
После издания книги со всех концов нашей Отчизны, а также стран ближнего и дальнего зарубежья все эти годы шли благодарные отклики читателей. Среди них есть люди, которые имели счастье общаться с матушкой Антонией при ее жизни, есть те, кто узнали о ней впервые, но уже получили по молитвам к ней благодатную помощь. Сегодня, в день памяти старицы, мы публикуем несколько таких писем.
СХИМОНАХИНЯ АНТОНИЯ (КАВЕШНИКОВА АНАСТАСИЯ ЯКОВЛЕВНА; 1904–1998). ЧИТАТЬ ДАЛЕЕ...

ПАМЯТНЫЕ ДАТЫ

ПАМЯТНЫЕ ДАТЫ

ЦИТАТА ДНЯ


Душевное спокойствие приобретается от совершенной преданности себя воле Божией, без которой ничтоже с нами бысть, еже бысть.

(Прп. Антоний Оптинскитй)

ИКОНА ДНЯ

КАЛЕНДАРЬ

АКАФИСТЫ, СОСТАВЛЕННЫЕ АЛЕКСАНДРОМ ТРОФИМОВЫМ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ИЕРУСАЛИМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ВАЛААМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ПРИБАВЛЕНИЕ УМА»

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОРСУНСКИЯ (ЕФЕССКИЯ)

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОЛОЧСКИЯ

АКАФИСТ СВ. АП. И ЕВ. ИОАННУ БОГОСЛОВУ

АКАФИСТ СВ. МЧЧ. ФЛОРУ И ЛАВРУ

АКАФИСТ СВТТ. АФАНАСИЮ И КИРИЛЛУ, АРХИЕП. АЛЕКСАНДРИЙСКИМ

АКАФИСТ СВТ. ТИХОНУ, ПАТРИАРХУ МОСКОВСКОМУ И ВСЕЯ РОССИИ

АКАФИСТ СВВ. ЦАРСТВЕННЫМ СТРАСТОТЕРПЦЕМ

АКАФИСТ ПРП. ИЛИИ МУРОМЦУ

АКАФИСТ ПРП. АНТОНИЮ ДЫМСКОМУ

АКАФИСТ ПРП. ВАРЛААМУ СЕРПУХОВСКОМУ

АКАФИСТ ПРП. ОТРОКУ БОГОЛЕПУ ЧЕРНОЯРСКОМУ

АКАФИСТ СВ. ПРАВ. ИОАННУ РУССКОМУ

АКАФИСТ ПРП. ПАИСИЮ ВЕЛИЧКОВСКОМУ

АКАФИСТ ПРП. ВАРНАВЕ ГЕФСИМАНСКОМУ

АКАФИСТ СВМЧ. СЕРАФИМУ (ЗВЕЗДИНСКОМУ), ЕП. ДМИТРОВСКОМУ

АКАФИСТ ПРПМЧЧ. СЕРАФИМУ И ФЕОГНОСТУ АЛМА-АТИНСКИМ

АКАФИСТ ПРП. СЕРАФИМУ ВЫРИЦКОМУ

АКАФИСТ СЩМЧ. ЯРОСЛАВУ ЯМСКОМУ

АКАФИСТ ПРП. СИЛУАНУ АФОНСКОМУ

АКАФИСТ СВ. ВМЧЦ. МАРИНЕ

АКАФИСТ СВ. РАВНОАП. ВЕЛ. КН. ОЛЬГЕ

АКАФИСТ ПРП. БЛГВ. КН. ЕВФРОСИНИИ МОСКОВСТЕЙ

АКАФИСТ СВ. ПРАВ. ИУЛИАНИИ МИЛОСТИВЕЙ, ЯЖЕ В СЕЛЕ ЛАЗАРЕВЕ

АКАФИСТ БЛЖ. КСЕНИИ ПЕТЕРБУРЖСТЕЙ

АКАФИСТ ПРПМЦ. ВЕЛ. КН. ЕЛИСАВЕТЕ

АКАФИСТ ВСЕМ СВ. ЖЕНАМ, В ЗЕМЛИ РОССИЙСТЕЙ ПРОСИЯВШИМ

АКАФИСТ СОБОРУ СВ. ВРАЧЕЙ-БЕЗСРЕБРЕНИКОВ-ЦЕЛИТЕЛЕЙ И ЧУДОТВОРЦЕВ

Рубрики

ПОИСК В ПРАВОСЛАВНОМ ИНТЕРНЕТЕ

Поиск в православном интернете: 

СПИСОК ВСЕХ СТАТЕЙ

СЧЕТЧИК