Акафисты

АКАФИСТ ПРЕСВЯТЕЙ ВЛАДЫЧИЦЕ НАШЕЙ БОГОРОДИЦЕ В ЧЕСТЬ ИКОНЫ ЕЯ КОЛОЧСКИЯ

koloch
Кондак 1

Взбранной Воеводе Владычице нашей Богородице благодарственное приносим пение о явлении дивныя иконы Ея Колочския, землю Можайскую просветившей и вся верная чада Церкве возвеселившей. Ты же, яко Всемилостивая Заступница и Всеблагая Помощница всех верою притекающих к Тебе от всяких бед и напастей защити, да зовем Ти:
Радуйся, Владычице, иконою Твоею любовь и милость нам являющая.

Икос 1

Ангел множество и человек собори славят Тебе, Небесе и земли Царицу, о явлении иконы Твоея Колочския, в земле Московской древле просиявшую, яко сокровище неисчерпаемое, явленное для вечнаго спасения нашего. Темже мы, все упование на Тя возложивше и на святый образ Твой взирающе, во умилении сердец взываем тако:
Радуйся, страну Российскую в жребий и достояние Себе избравшая;
радуйся, иконы Твоя чудотворныя, яко звезды в ней умножившая.
Радуйся, Дево Пресвятая, образ Твой чудесно нам явившая;
радуйся, землю Московскую светом его озарившая.
Радуйся, земли Можайстей икону Твою в залог благоволения даровавшая;
радуйся, чудесы Твоими веру в ней утвердившая.
Радуйся, обители Колоцкия дивная строительнице;
радуйся, верная ея защитнице.
Радуйся, болезни душевныя и телесныя иконою Твоею скоро врачующая;
радуйся, во всяких бедах и нуждах скорая наша помощнице.
Радуйся, Лествице Небесная, от земли к Небеси возводящая;
радуйся, радости вечныя нас сподобляющая.
Радуйся, Владычице, иконою Твоею любовь и милость нам являющая.

Кондак 2

Видя муж благочестивый Лука, егда изыде на делание свое, пречудную икону Твою, Владычице, на древе бывшую, в дом свой принесе ю. Темже познавше святую икону Твою, яко дар милосердия людем, Тобою низпосылаемый, возопи Богу благодарственную песнь: Аллилуиа.

Икос 2

Разум богопросвещен и веру в благодатную силу Богоматере имущи, человек некий многа лета разслаблен лежащь в дому Луки, умоли его, да принесет к нему икону обретенную, и приложившись, в той же час воста весь здрав, яко николиже болев. Мы же, сие первое чудо от иконы Твоея, Всемилостивая Мати, прославляюще, похвальными песньми Тебе взываем:
Радуйся, святую икону даровати нам изволившая;
радуйся, покров ея над землею нашею простершая.
Радуйся, селянину благочестивому икону Твою явившая;
радуйся, чудотворную силу в ней открывшая.
Радуйся, иконою Твоею разслабленнаго от одра воздвигшая;
радуйся, во благих прошения наша исполняющая.
Радуйся, Мати Господа Сил, разслабленных возставляющая;
радуйся, болезней многолетных исцеление скорое и совершенное.
Радуйся, прошения молящихся Тебе к Богу возносящая;
радуйся, крест жизни нашея нести помогающая.
Радуйся, всего мира Божественное утешение;
радуйся, надеждо нашего спасения.
Радуйся, Владычице, иконою Твоею любовь и милость нам являющая.

Кондак 3

Силою Божиею, чрез святыя иконы Твоя являемою, спасати землю нашу не престаеши, Всеблагая Владычице, тако и зде, в веси Колочстей великая и многая чудеса показала еси от многоцелебнаго образа Твоего. И начаша чтити Луку людие якоже пророка и апостола, и вси с верою молящиися пред иконою в радости взываша: Аллилуиа.

Икос 3

Имущи велию ревность по Бозе и познав в явлении образа Твоего, Богомати, милосердие Твое ко всем спасения хотящим получити, благоверный князь Можайский Андрей возжеле видети святую икону во граде княжения своего. Тогда поиде Лука с иконою из Колочи к Можайску и весь град изыде в сретение святыни. И быша знамения и чудеса от иконы Твоея, Пречистая, и вси людие поклоняхуся ей и со слезами взываху Тебе:
Радуйся, почитания святых икон освящение;
радуйся, веры христианския утверждение.
Радуйся, весь Колочскую чудесы великими прославившая;
радуйся, страны нашея сокровище духовное.
Радуйся, образ Твой святый первым в земли Московстей чудесно явившая;
радуйся, яко икона Твоя в наследие спасительное земле Можайстей даровася.
Радуйся, явлением иконы Твоея град Можайск возвеселившая;
радуйся, милостивым ликом Твоим сердца жителей его возрадовавшая.
Радуйся, чудесы шествием иконы Твоея по земли нашей знаменовавшая;
радуйся, весну спасения многим людем возвестившая.
Радуйся, пред Сыном Твоим дерзновенная наша предстательнице;
радуйся, неисчерпаемый источниче милостей и щедрот.
Радуйся, Владычице, иконою Твоею любовь и милость нам являющая.

Кондак 4

Бурею скорбей и искушений одержими, жителие града Москвы душевную радость и покой обретают, молящеся пред чудотворною иконою Твоею, Богомати. ибо принесе Лука святую икону в первопрестольный град, идеже святитель Фотий со епископы и всем собором с радостию велиею сретоша ю. Множество же народа, к дивней иконе с верою прихождаху и исцеление недугов приимаху, благодарственно воспевающе ко Господу, истинному Врачу душ и телес: Аллилуиа.

Икос 4

Слышавше о великих чудесех и знамениих от иконы Твоея, Владычице, вернии чада Церкве притекаху к целебному образу Твоему, приемлюще от него дары милостей Твоих. И хождаше Лука от града во град с иконою Твоею, и везде безчисленная исцеления бываху, и вси людие даяху милостыню, зряще благодать, от иконы Твоея источаемую, и прославляху Тя сице:
Радуйся, торжество веры православныя в шествии Твоея иконы явившая;
радуйся, градов и весей земли нашея покрове и ограждение.
Радуйся, первопрестольный град иконою Твоею посетившая;
радуйся, благословением Твоим его осенившая.
Радуйся, явлением чудес от иконы Твоея жителей его обрадовавшая;
радуйся, пришествием иконы Твоея многия беды и скорби от верных отгнавшая.
Радуйся, яко пред иконою Твоею людие православнии благоговейно поклоняются;
радуйся, яко дивная знамения тою совершаются.
Радуйся, в скорбех и печалех отраду в сердца наша изливающая;
радуйся, Заступнице Усердная, от Бога нам дарованная.
Радуйся, яко в видимом образе Твоем невидимо силу благодати обретаем;
радуйся, всей земли нашей силу всемогущества Христова возвещающая.
Радуйся, Владычице, иконою Твоею любовь и милость нам являющая.

Кондак 5

Боготечною звездою возсия икона Твоя, Владычице, озаряя сердца русских людей, мрак печалей и мглу всяческих недуг и скорбей прогоняющая и на путь спасения наставляющая всех любящих Тя. Лука же, имея всеусердное желание образ Твой чудотворный достойно почтити, воздвиже церковь каменную во имя Успения Твоего на месте явления святыя иконы, да вси видевшии чудеса от нея молитвы в церкви той возносят, непрестанно воспевая Богу: Аллилуиа.

Икос 5

Видевше людие вернии Луку одержима бурею страстей, наипаче же грехми пиянства, объядения и сребролюбия, молишася Тебе, Пречистая, да вразумиши избранника Своего. Ты же, Всемилостивая Владычице, спасти хотя от заблуждения жизненнаго пути его, наказала еси Луку; он же возлежа на одре смертнем, искреннее покаяние принесе, и, востав со одра болезни, пред иконою Твоею с верою несумненною и благодарным сердцем вознесе Тебе похвалы сия:
Радуйся, благолепный храм Успения Твоего чудотворною иконою Твоею украсившая;
радуйся, молитвы верных милостиво в нем приемлющая.
Радуйся, чудесы многими его освятившая;
радуйся, во храме сем красоту храма небеснаго показавшая.
Радуйся, руку милосердия погибающим простирающая;
радуйся, на путь правды заблуждших обращающая.
Радуйся, борющихся со страстьми всегдашняя помощнице;
радуйся, кающихся грешников пред Богом крепкая заступнице.
Радуйся, слезному покаянию падших научающая;
радуйся, Домостроительнице, житие наше добре устрояющая.
Радуйся, о всех чтущих образ твой промышляющая;
радуйся, молящимся пред ним спасение подающая.
Радуйся, Владычице, иконою Твоею любовь и милость нам являющая.

Кондак 6

Проповедник неизреченнаго милосердия Твоего явися раскаявшийся Лука, иже повеле имением своим на месте обретения иконы монастырь во имя Успения Твоего устроити, в немже пострижеся сам и поживе во умилении и слезах, дондеже преставися и погребен в нем бысть. Ты же, Всеблагая, под кров Свой святый многих иноков собрала еси, да во славу Божию и ради спасения душ своих труждаются, неустанно воспевая Богу: Аллилуиа.

Икос 6

Возсия радость велия в людех, егда не токмо от образа Твоего, Пресвятая Владычице, благодатныя дары исцелений подаются, но и в водных струях источника близ места явления иконы проистекшаго, изобильно черпают благодатное врачевание вси болящии, страждущии, помощи требующии, и сердечною верою прославляют Тя, небесную Целительницу нашу, воспевающе Тебе похвалы сия:
Радуйся, Церкве Православныя хранительнице;
радуйся, премудрая Игумение всех обителей православных.
Радуйся, обители Колоцкия радосте и покрове;
радуйся, сиянием иконы Твоея подвизающихся в ней просветившая.
Радуйся, обителей святых и храмов благословение и утверждение;
радуйся, иноков и инокинь благоговейных наставнице.
Радуйся, образом Твоим чудотворным струи водныя освятившая;
радуйся, водою источника Твоего болящих возставляющая.
Радуйся, источником нетления и радости жаждущих души напаяющая;
радуйся, духовную жажду нашу утоляющая.
Радуйся, каменю, воду жизни источивый жаждущим;
радуйся, яко живоносную силу водный источник Твой доныне сохраняет.
Радуйся, Владычице, иконою Твоею любовь и милость нам являющая.

Кондак 7

Хотящи Руси от врагов разоряемой милосердие явити, благоизволила еси, Владычице, даровати воинству русскому икону Твою Колоцкую: тогда, яко глаголет летописец, изволи царь Иоанн Васильевич Грозный взяти чудотворную Твою икону в поход на Полоцк, и поведе воины своя на враги, и победу одержа. Сего ради прославляюще Тя, воспеваем Сыну Твоему и Богу нашему победную песнь: Аллилуиа.

Икос 7

Новое знамение милости Твоея явила еси, Пресвятая Богородице, во дни нашествия дванадесяти язык на землю нашу, егда надежда спасения угасе, яко и сердце России – град Москва пленен и сожжен бысть. Ты же, Владычице, стена и щит России была еси, дарующи благодатную помощь христолюбивым воином, и святыми иконами Твоими, Смоленскою, Колочскою и иными многими укрепила еси его, таже и победу дивную на враги сильныя и бранеискусныя даровала еси, и с безчестием их от отечества нашего отгнала еси. Темже хвалу и благодарение Тебе приносяще, взываем:
Радуйся, Царства Российскаго благодатное утверждение;
радуйся, врагов его грозное посрамление.
Радуйся, от нашествия иноплеменных отечество наше спасающая;
радуйся, во бранех силу духа воинов русских возвышающая.
Радуйся, боголюбивых воинов верная хранительнице;
радуйся, благая их покровительнице.
Радуйся, воинов русских на подвиг ратный укрепляющая;
радуйся, венец победы им сплетающая.
Радуйся, всех за други своя душу положивших упокоение;
радуйся, за веру и отечество на поли брани убиенных прославление.
Радуйся, иконы Твоя чудотворныя, яко знамя победы народу нашему даровавшая;
радуйся, непобедимая Воеводо вождей и воинов православных.
Радуйся, Владычице, иконою Твоею любовь и милость нам являющая.

Кондак 8

Странное и преславное чудо зрим о Тебе, Богомати, егда губительная язва на страну нашу найде и множество людей умертвиша. Людие же, гнев Божий видяще, со слезами ко святей иконе Твоей припадаху, яко к источнику Твоего милосердия, и исцеляхуся. Сего ради вернии земли Можайстей на всяко лето возносят моление теплое в память сего радостнаго торжества спасения многих от погибели, воспевая Богу благодарственно: Аллилуиа.

Икос 8

Весь мир христианский славит имя Твое, Преблагословенная Мати Господа, и всем верным утешительно есть взирати на святую икону Твою, на нейже видим Тя, на руку держащую Превечнаго Младенца, с предстоящими святителем Николаем и пророком Илиею. Всяк бо с верою к ней приходяй в болезнех исцеление, в скорбех утешение, в бедах вспоможение скоро приемлет, сердце же свое в любви Божией утверждает, вопиюще к Тебе, Утешительнице и Помощнице нашей таковая:
Радуйся, молитвами святителя Николая и пророка Божия Илии землю нашу ограждающая;
радуйся, в годину бедствий на помощь нам ускоряющая.
Радуйся, во дни мора непреложная наша надеждо и спасительнице;
радуйся, от смертоносныя язвы милостивая избавительнице.
Радуйся, прекращением язвы благодатную силу иконы Твоея возвестившая;
радуйся, заступлением Твоим праведный гнев Божий утоляющая.
Радуйся, язв душевных и телесных целительнице;
радуйся, всех духовных даров щедрая подательнице.
Радуйся, души и сердца наша любовию Божественною воспламеняющая;
радуйся, самоотвержению и послушанию нас научающая.
Радуйся, Хлебом жизни нас питающая;
радуйся, яко Тобою сладостей духовных исполняемся.
Радуйся, Владычице, иконою Твоею любовь и милость нам являющая.

Кондак 9

Всю страну Российскую потрясе буря гонений на Церковь Христову попущением Божиим, за грехи наша и беззакония: безумнии богоборцы святыни наша разориша, храмы Божии оскверниша и кровь христианскую пролияша. Тогда обитель Колоцкая разрушена бысть от неистовых гонителей, икона же Твоя, Богомати, отъята и сокрыта бе от верных. Но не возможе враг рода человеческаго угасити веру в покров Твой людей православных, в сокрушении сердец взывающих Богу: Аллилуиа.

Икос 9

Ветия многовещанныя не возмогут прославити по достоянию дивное воистинну промышление Твое, Владычице, во времена, егда Церковь Русская от пленения власти безбожныя свобождается, разоренныя обители и храмы возставляются и красота церковная обновляется. Тако и Колоцкая обитель, насилием от Церкви отторженная, заступлением Твоим, Богомати, паки возвратися людем православным, в нейже ныне собранных Тобою сестер во Христе просвещаеши и на путь спасения наставляеши, подвизающи их воспевати Тебе с любовию таковая:
Радуйся, Церковь Христову во дни гонений омофором Твоим покрывшая;
радуйся, всем страдальцам за веру благодатное утешение посылавшая.
Радуйся, истину, непрестанно распинаемую, защитившая;
радуйся, изнемогающих под тяжестию креста укрепление.
Радуйся, сущих в темницех и заточении правды ради посещение и избавление;
радуйся, врагов веры истинныя посрамившая.
Радуйся, гонимым за правду Царствие Небесное уготовляющая;
радуйся, Собором святых новомучеников и исповедников Российских сугубо воспеваемая.
Радуйся, обитель Твою, от безбожных разоренную, возставившая;
радуйся, благодать Твою воставленней обители ниспославшая.
Радуйся, многих дев и жен ко служению Богу зде собравшая;
радуйся, ко спасению их добрая наставнице.
Радуйся, Владычице, иконою Твоею любовь и милость нам являющая.

Кондак 10

Спасти хотя многия люди от находящих скорбей и болезней и веру их утвердити во всесильное заступление Твое, Пресвятая Дево, явила еси дивное чудо, егда список древняго чудотворнаго образа Твоего Колочскаго торжественно с молебным пением принесен бысть в обитель Твою. Ныне же, Всемилостивая Мати, образ Твой новообретенный точит исцеления многим немощствующим, прибегающим к Тебе, да вси облагодатствованнии Тобою согласно воспевают Богу песнь: Аллилуиа.

Икос 10

Стена еси, Владычице, и прибежище сестрам обители Колоцкия, идеже теплится лампада неугасимая пред чудотворным образом Твоим, и воздыхания молитвенныя сестер даже в нощи не умолкают. Ты бо благословила еси обитель святынею Своею, ограждающи инокинь от вражиих козней, от бед, скорбей и напастей. Тебе бо вручи их Господь и дарова благодать вразумляти на добродетель, да непрестанно славят Бога и воспевают Тебе похвалы сии:
Радуйся, обители Колоцкия неусыпная блюстительнице;
радуйся, икон Своих чудотворных хранительнице.
Радуйся, святую икону Твою даровати сестрам обители изволившая;
радуйся, внити с мудрыми девами в Царствие Небесное им помогающая.
Радуйся, обитель Твою иконою, аки даром драгоценным, обогатившая;
радуйся, сердца инокинь обители обретением иконы возвеселившая.
Радуйся, чудесы от иконы сия обитель Колоцкую прославльшая;
радуйся, мирное житие сестер в ней устрояющая.
Радуйся, новую милость и благодать иконою Твоею показавшая;
радуйся, приходящих к ней с верою христиан покровительнице.
Радуйся, поклоняющимся иконе Твоей радость духовную подающая;
радуйся, яко молитвою пред нею приемлем благодатное утешение.
Радуйся, Владычице, иконою Твоею любовь и милость нам являющая.

Кондак 11

Пение хвалебное приносим Ти с любовию, Богородице, великое бо множество чудес являеши: се, непраздная раба Божия, спасти хотя умершаго во чреве младенца своего, вознесла еси слезную молитву Тебе, Благодатная, во обители Колоцстей, и помаза себе елеем от чудотворныя иконы; в той же час оживе младенец и егда родися, нарекоша ея родители Анастасиею, сиречь воскресением, благодарными усты воспевая песнь: Аллилуиа.

Икос 11

Светоприемную свещу во тьме сущим явльшуюся зрим святую икону Твою, Владычице Всемилостивая, сия бо сердца наша любовию согревает, богохранимую страну нашу благодатию озаряет и обитель Колоцкую освещает. Темже молим Тя: до последних дней мира обитель сию сохрани, подвизающимся в ней сестрам во Христе путь верный к Небеси укажи, мудрость и терпение им даруй, да сподобятся до скончания дней своих в радости воспевати Тебе сице:
Радуйся, обители Колоцкия благодатное сокровище;
радуйся, инокинь ея незримая воспитательнице.
Радуйся, нощных бдений и молений сестер ея скорое услышание;
радуйся, инокинем обители надеждо вечнаго спасения.
Радуйся, всем зде подвизающимся всемощная покровительнице;
радуйся, и в миру благочестно живущих дев и жен усердная заступнице.
Радуйся, умершаго во чреве младенца воскресившая;
радуйся, жену разслабленную пред иконою Твоею исцелившая.
Радуйся, неплодных супругов чадородием утешающая;
радуйся, молящихся Тебе светом благодати озаряющая.
Радуйся, всех притекающих к иконе Твоей благословляющая;
радуйся, всем просящим море щедрот Твоих изливающая.
Радуйся, Владычице, иконою Твоею любовь и милость нам являющая.

Кондак 12

Благодати неистощимыя знамения являеши всем притекающим в обитель Колоцкую и Тебе, Богородицу и Матерь Света в песнех величающим: Ты бо молитву безчадных супругов, пришедших к чудотворней иконе Твоей, не оставила еси тщетну, но даровала еси им младенца, егоже нарекоша именем Феодор, сиречь Божий дар. Мы же, взирающе на святую икону Твою и видяще множество чудес от нея изливаемых, из глубины сердец воспеваем благодарственную песнь: Аллилуиа.

Икос 12

Поющи Твоя древняя и новая милости, восхваляем икону Твою Колочскую, Богомати, к нейже в память ея явления во множестве людие от всех концов России притекают, чающе от Тебе скорбей избавления, недугов исцеления, радости исполнения и благ вечных сподобления. Ты же, Всемилостивая, благодеяния неисчетныя иконою Твоею даруеши, да вси собраннии во обители на Колочи в радости воспевают Тебе:
Радуйся, благодать велию иконам Твоим даровавшая;
радуйся, всю вселенную лучами тех озарившая.
Радуйся, отечества нашего Свет Невечерний;
радуйся, Стено Нерушимая, от всяких бед нас ограждающая.
Радуйся, иконою Твоею мрак греховный отгоняющая;
радуйся, на подвиг духовный невидимо нас укрепляющая.
Радуйся, яко Сыну Твоему в Твоей честней иконе благодарно поклоняемся;
радуйся, Небесным воинством невидимо славословимая.
Радуйся, обителей иноческих дивная попечительнице;
радуйся, миро благоуханное, всему миру излиянное.
Радуйся, Обрадованная, во Успении Твоем нас не оставляющая;
радуйся, Благая Вратарнице, двери райския верным отверзающая.
Радуйся, Владычице, иконою Твоею любовь и милость нам являющая.

Кондак 13

О Всепетая Мати, рождшая всех святых святейшее Слово! Приими молебное пение наше, пред чудотворною иконою Твоею с верою и благоговением возносимое, избави нас от всяких бед, скорбей и напастей, недуги наша исцели, всяку злобу и вражду отжени от нас и будущия изми муки о Тебе вопиющих: Аллилуиа.

Этот кондак читается трижды, затем икос 1-й: «Ангел множество и человек собори славят Тебе …» и кондак 1-й: «Взбранной Воеводе Владычице нашей Богородице…»

МОЛИТВА КОЛОЧСКОЙ ИКОНЕ БОЖИЕЙ МАТЕРИ

О Пресвятая Владычице Богородице, Царице Небесе и земли, Высшая ангел и Архангел и всея твари Честнейшая, Чистая Дево Марие, миру Благая Помощнице, всех христиан Поможение и Утверждение, и всем во всяких нуждах Избавление! Призри ныне, о, Всемилостивая Госпоже, на рабы Твоя, умиленною душею и сокрушенным сердцем Тебе молящихся, со слезами к Тебе припадающих и пречистому и цельбоносному образу Твоему поклоняющихся, Твоея же помощи и заступления в скорбех и напастех своих просящих. Буди за нас Ходатаица к Сыну Твоему, Христу Богу нашему: мы бо грешнии не имамы иныя Помощницы разве Тебе, Владычице. Ты еси наша Надежда и Упование, Ты еси Заступница и Предстательница наша, Ты еси обидимых Защищение, печальных Утешение, скорбящих Радование, сирых Прибежище, вдов Хранительница, дев Слава, плачущих Веселие, больных Посещение, немощных Исцеление, грешных Спасение. Сего ради, о Богомати, к Тебе прибегаем, и на Твой Святый образ взирая, с любовию поклоняемся Тебе с предвечным на руку Твоею держимым Младенцем, Господем нашим Иисусом Христом, и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему и Богу нашему, Емуже подобает всякая слава, честь и поклонение и благодарение, со Безначальным Его Отцем и со Присносущным Духом, ныне и присно и во веки веков. Аминь.

ИНА МОЛИТВА, КОЛОЧСКОЙ ИКОНЕ БОЖИЕЙ МАТЕРИ, ЧТОМАЯ В УСПЕНСКОМ КОЛОЦКОМ МОНАСТЫРЕ

О Преблагословенная Госпоже Владычице Богородице, премудрая Небесная Игумение и Путеводительнице ко спасению инокинь обители, именем Успения Твоего нареченной, юже избрала еси в достояние Свое на месте сем, Твоим благословением осененном! Умоли Сына Твоего и Бога нашего спасти от погибели всех подвизающихся в обители нашей, и якоже древле на месте сем многая милости Своя явила еси, тако и ныне даруй Покров Твой над обителию и над нами, недостойными чады Твоими, грешнии бо есмы, но раби Твои до века. Темже молим Тя: озари души наша светом Божественныя благодати, покрый нас от всякаго зла, сохрани от всякия напасти и клеветы человеческия и от навета вражия; болящим здравие даруй, души наша от плена страстей свободи, утверди в мире и согласии житие наше, даруй нам кончину христианскую, безболезненну, непостыдну, мирну, Божественных Таин причастну, и Сама нас в той час спаси от горьких мытарств, и сподоби в день Суда стати одесную Сына Твоего, Христа Бога нашего. Призри на обитель сию и сохрани ю целу и невреждену, да возвышается и славится в ней имя Пресвятыя Троицы и Твое, Богомати, преблагословенное имя во веки веков. Аминь.

ИКОНЕ БОЖИЕЙ МАТЕРИ КОЛОЧСКОЙ

Тропарь, глас 4:

Днесь возсия неизреченно месту Колочу икона Богоматере, / и яко светозарным солнцем пришествием тоя озарися место то, / Небесныя Силы и души праведных мысленно торжествуют радующеся, /мы же на ню взирающе, к Богородице со слезами вопием: / О Всемилостивая Госпоже, Владычице Богородице, / молися из Тебе воплощенному Христу Богу нашему, / да подаст мир и здравие Христианом по велицей и неизреченней Своей милости.

Кондак, глас 8:

Тебе, избранней от всех родов Божией Матери, / благодарственное пение приносим, / прославляюще явление иконы Твоея Колочския / и поклоняющеся ей усердно вопием: / сохрани обитель Твою, / ейже дивную святыню даровала еси во отраду и утешение, / от всяких нас бед и скорбей свободи, да зовем Ти: / радуйся, Невесто Неневестная.

СКАЗАНИЕ О КОЛОЧСКОЙ ЧУДОТВОРНОЙ ИКОНЕ БОЖИЕЙ МАТЕРИ

©Акафист составлен А. Трофимовым

Добавьте комментарий

Нажмите, чтобы оставить комментарий

ПАМЯТНЫЕ ДАТЫ

18 МАРТА – НАЧАЛО ВЕЛИКОГО ПОСТА
post
ВЕЛИКИЙ ПОСТ. ЧИТАТЬ ДАЛЕЕ…

ПАМЯТНЫЕ ДАТЫ

ПЕРВАЯ СЕДМИЦА ВЕЛИКОГО ПОСТА
post3
ПЕРВАЯ СЕДМИЦА ВЕЛИКОГО ПОСТА. ЧИТАТЬ ДАЛЕЕ…

К 100 ЛЕТИЮ МАРИИ СЕРГЕЕВНЫ ТРОФИМОВОЙ. ЦИТАТЫ ИЗ ДНЕВНИКОВ

К 100 ЛЕТИЮ МАРИИ СЕРГЕЕВНЫ ТРОФИМОВОЙ
К 100 ЛЕТИЮ МАРИИ СЕРГЕЕВНЫ ТРОФИМОВОЙ.
ЦИТАТЫ ИЗ ДНЕВНИКОВ

ПРЕПОДОБНЫЙ СТАРЕЦ АЛЕКСИЙ (СОЛОВЬЕВ)

Старец Алексий жил в Сергиевом Посаде, когда по указанию безбожной власти начали вскрывать мощи святых. Старец печалился об этом и много молился, недоумевая – почему Господь попускает совершаться такому злу? Однажды вечером, когда он совершал молитвенное правило, рядом с ним встал прп. Сергий Радонежский и сказал:
– Молись три дня и постись, и после этого я скажу тебе то, что
нужно.
В следующие два дня, когда отец Алексий молился, снова вставал с ним рядом прп. Сергий. Отец Алексий питался в эти дни одной просфорой. На третий день преподобный сказал:
– Когда подвергаются такому испытанию живые люди, то необходимо, чтобы этому подвергались и останки людей умерших. Я сам отдал тело свое, чтобы град мой во веки был цел.

2 МАЯ 2001 г. ОСВЯЩЕНИЕ ЧАСОВНИ СВ. МАТРОНЫ В Г. СХОДНЯ

ПАМЯТНЫЕ ДАТЫ

17 МАРТА – НЕДЕЛЯ СЫРОПУСТНАЯ. ПРОЩЕНОЕ ВОСКРЕСЕНЬЕ. ЗАГОВЕНЬЕ НА ВЕЛИКИЙ ПОСТ
ПРАОТЕЦ АДАМ. ФРЕСКА. КОНСТАНТИНОПОЛЬ. 1416-1321 гг.
ПРОЩЕНОЕ ВОСКРЕСЕНЬЕ. ЧИТАТЬ ДАЛЕЕ…

ПАМЯТНЫЕ ДАТЫ

ПАМЯТНЫЕ ДАТЫ

14 МАРТА – ДЕНЬ АНГЕЛА АНТОНИНЫ СЕРГЕЕВНЫ ОРЛОВОЙ (ТРОФИМОВОЙ)

АНТОНИНА СЕРГЕЕВНА ОРЛОВА (ТРОФИМОВА). ЧИТАТЬ ДАЛЕЕ…

ПАМЯТНЫЕ ДАТЫ

13 МАРТА – ПРЕПОДОБНЫЕ МАРИНА И КИРА БЕРИЙСКИЕ

ПРЕПОДОБНЫЕ МАРИНА И КИРА БЕРИЙСКИЕ. ЧИТАТЬ ДАЛЕЕ…

ПАМЯТНЫЕ ДАТЫ

10 МАРТА – 70 ЛЕТ СО ДНЯ КОНЧИНЫ СТАРЦА ЗОСИМОВОЙ ПУСТЫНИ ИЕРОСХИМОНАХА ИННОКЕНТИЯ (ОРЕШКИНА; 05.06.1870–10.03.1949)
ИЕРОСХИМОНАХ ИННОКЕНТИЙ (ОРЕШКИН)
ИЕРОСХИМОНАХ ИННОКЕНТИЙ (ОРЕШКИН ИВАН ИГНАТЬЕВИЧ). ЧИТАТЬ ДАЛЕЕ…

ВЕЧЕР ПАМЯТИ МАРИИ СЕРГЕЕВНЫ ТРОФИМОВОЙ

ДЕНЬ АНГЕЛА МАРИИ СЕРГЕЕВНЫЙ ТРОФИМОВОЙ

25 ИЮЛЯ — ДЕНЬ АНГЕЛА МАРИИ СЕРГЕЕВНЫ ТРОФИМОВОЙ

29 МАРТА — ДЕНЬ ПАМЯТИ МАРИИ СЕРГЕЕВНЫ ТРОФИМОВОЙ

ПАМЯТНЫЕ ДАТЫ. К 100 ЛЕТИЮ МАРИИ СЕРГЕЕВНЫ ТРОФИМОВОЙ

О МЕСЯЦЕ МАРТЕ

Мама жила в ритме природы, постоянно любовалась своим садом в разное время года, специально выходила помолиться среди кустов и деревьев. В течение многих лет она делала выписки из разных книг и статей по народному календарю: там были сведения о приметах погоды в связи с церковным календарем, о прилете и отлете птиц, о свойствах и красоте цветов, деревьев и других растений, а также камней и минералов. Мы постоянно выписывали журнал «Наука и жизнь», из которого мама вырезала и подшивала ежемесячные заметки о природе и календаре. Из того, что собрала мама, можно было бы составить интереснейшую книгу. Все эти материалы были постоянно «в ходу»: когда приходили очередные посетители, мама открывала раздел своего собрания, соответствующий месяцу, неделе и даже конкретному дню и начинала читать выдержки. В такие минуты я не выдерживал, оставлял все свои дела и присоединялся к слушателям…

К сожалению, размеры книги не позволяют опубликовать интереснейшие сведения, которые собрала мама по народному календарю. Поэтому вниманию читателей предлагается лишь один календарный месяц – март. Весна была любимым временем года, а март – любимым ее месяцем, недаром в нем совершились столько важнейших событий ее жизни. 21 марта родился я, в марте сделали маме серьезную операцию, в марте умер мой отец, в марте отошла в вечность и мама. Она знала, что уйдет из жизни в марте, знала даже число – 29-е, о чем сохранились такие свидетельства: за день до смерти она попросила меня снять все деньги с ее пенсионной книжки, чтобы не нужно было потом ходить по инстанциям и оформлять наследство (и здесь, даже перед лицом смерти она думала о том, как избавить сына от лишних хлопот). Сохранился листок с выпиской из церковного календаря, сделанный рукой мамы: на нём записаны даты от 27 до 31 марта с указанием памяти святых каждого дня. Сделана эта запись много лет назад, еще до смерти отца, и именно в этом интервале умерли отец (27 марта) и мама (29 марта – день памяти мученика Трофима).

О МЕСЯЦЕ МАРТЕ. ЧИТАТЬ ДАЛЕЕ

МАРТ. ДЕНЬ ЗА ДНЕМ. ЧИТАТЬ ДАЛЕЕ

А. Трофимов

ИСТОРИЧЕСКИЙ КАЛЕНДАРЬ

О МОЛИТВЕ

http://alexandrtrofimov.ru/wp-content/uploads/2014/05/7mol10.jpg

Дорогие посетители сайта, пришло время вспомнить и восстановить древнюю ветхозаветную и апостольскую традицию – семиразовую молитву в течение суток, совершаемую каждые три часа (в 6, 9, 12, 15, 18, 21, 24 часа). Эта молитва особенно действенна в условиях испытания, посланного нам – угрозы распространения коронавирусной инфекции.
Предлагаю Вам ознакомиться с главой из книги «РИТМЫ ЦЕРКОВНОГО ГОДА», написанной много лет назад и размещенной на этом сайте: О СЕМИРАЗОВОЙ МОЛИТВЕ В ТЕЧЕНИЕ СУТОК. ЧИТАТЬ ДАЛЕЕ… http://alexandrtrofimov.ru/?p=766
В ней дается историческое и богословское обоснование необходимости этой молитвы. Сейчас, в условиях карантина православным людям совсем не сложно включиться в этот молитвенный ритм.
Присоединяйтесь к ежедневной семиразовой молитве, рассылайте текст статьи и сообщения о ней своим друзьям и знакомым.
***
Святейший Патриарх Кирилл благословил молитву, которую уже произносят за богослужением во всех православных храмах, ее можно присоединить к семиразовой молитве:
МОЛИТВА ВО ВРЕМЯ РАСПРОСТРАНЕНИЯ ВРЕДОНОСНОГО ПОВЕТРИЯ ЧТОМАЯ
Господи Боже наш, не вниди в суд с рабы Твоими, и огради нас от губительнаго поветрия на ны движимаго. Пощади нас смиренных и недостойных рабов Твоих в покаянии с теплою верою и сокрушением сердечным к Тебе милосердному и благопременительному Богу нашему припадающих и на милость Твою уповающих. Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.
Александр Трофимов

ПАМЯТНЫЕ ДАТЫ

25 ЯНВАРЯ - ДЕНЬ АНГЕЛА ТАТИАНЫ ВАСИЛЬЕВНЫ ТРОФИМОВОЙ (1886–1934), МАТЕРИ МАРИИ СЕРГЕЕВНЫ ТРОФИМОВОЙ

23 ФЕВРАЛЯ – ПАМЯТЬ ПОЭТА ДАВИДА САМОЙЛОВА

«БЫЛА ТУМАННАЯ ВЕСНА…» СТИХИ ДАВИДА САМОЙЛОВА, МУЗЫКА НЕИЗВЕСТНОГО АВТОРА, ИСПОЛНЯЕТ ЛЕОНИД ЭРДМАН

Помощь в издании книг

Благодарю за любую Вашу помощь! Присылайте Ваши имена для молитвенного поминовения на электронную почту atrofimovmail@yandex.ru

НАША СТРАНИЧКА ВКОНТАКТЕ

ДОБРО ПОЖАЛОВАТЬ!

Наша страничка в facebook

Video

3 ноября – ПАМЯТЬ ПРЕПОДОБНОМУЧЕНИКА НЕОФИТА (ОСИПОВА) – ЛИЧНОГО СЕКРЕТАРЯ ПАТРИАРХА ТИХОНА

АКАФИСТ СВЯТЕЙ ПРЕПОДОБНОМУЧЕНИЦЕ ВЕЛИЦЕЙ КНЯГИНЕ ЕЛИСАВЕТЕ

Грек Зорба

Грек Зорба

АКАФИСТЫ, СОСТАВЛЕННЫЕ АЛЕКСАНДРОМ ТРОФИМОВЫМ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ИЕРУСАЛИМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ВАЛААМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ПРИБАВЛЕНИЕ УМА»

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОРСУНСКИЯ (ЕФЕССКИЯ)

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОЛОЧСКИЯ

АКАФИСТ СВ. АП. И ЕВ. ИОАННУ БОГОСЛОВУ

АКАФИСТ СВ. МЧЧ. ФЛОРУ И ЛАВРУ

АКАФИСТ СВТТ. АФАНАСИЮ И КИРИЛЛУ, АРХИЕП. АЛЕКСАНДРИЙСКИМ

АКАФИСТ СВТ. ТИХОНУ, ПАТРИАРХУ МОСКОВСКОМУ И ВСЕЯ РОССИИ

АКАФИСТ СВВ. ЦАРСТВЕННЫМ СТРАСТОТЕРПЦЕМ

АКАФИСТ ПРП. ИЛИИ МУРОМЦУ

АКАФИСТ ПРП. АНТОНИЮ ДЫМСКОМУ

АКАФИСТ ПРП. ВАРЛААМУ СЕРПУХОВСКОМУ

АКАФИСТ ПРП. ОТРОКУ БОГОЛЕПУ ЧЕРНОЯРСКОМУ

АКАФИСТ СВ. ПРАВ. ИОАННУ РУССКОМУ

АКАФИСТ ПРП. ПАИСИЮ ВЕЛИЧКОВСКОМУ

АКАФИСТ ПРП. ВАРНАВЕ ГЕФСИМАНСКОМУ

АКАФИСТ СВМЧ. СЕРАФИМУ (ЗВЕЗДИНСКОМУ), ЕП. ДМИТРОВСКОМУ

АКАФИСТ ПРПМЧЧ. СЕРАФИМУ И ФЕОГНОСТУ АЛМА-АТИНСКИМ

АКАФИСТ ПРП. СЕРАФИМУ ВЫРИЦКОМУ

АКАФИСТ СЩМЧ. ЯРОСЛАВУ ЯМСКОМУ

АКАФИСТ ПРП. СИЛУАНУ АФОНСКОМУ

АКАФИСТ СВ. ВМЧЦ. МАРИНЕ

АКАФИСТ СВ. РАВНОАП. ВЕЛ. КН. ОЛЬГЕ

АКАФИСТ ПРП. БЛГВ. КН. ЕВФРОСИНИИ МОСКОВСТЕЙ

АКАФИСТ СВ. ПРАВ. ИУЛИАНИИ МИЛОСТИВЕЙ, ЯЖЕ В СЕЛЕ ЛАЗАРЕВЕ

АКАФИСТ БЛЖ. КСЕНИИ ПЕТЕРБУРЖСТЕЙ

АКАФИСТ ПРПМЦ. ВЕЛ. КН. ЕЛИСАВЕТЕ

АКАФИСТ ВСЕМ СВ. ЖЕНАМ, В ЗЕМЛИ РОССИЙСТЕЙ ПРОСИЯВШИМ

АКАФИСТ СОБОРУ СВ. ВРАЧЕЙ-БЕЗСРЕБРЕНИКОВ-ЦЕЛИТЕЛЕЙ И ЧУДОТВОРЦЕВ

СПИСОК ВСЕХ СТАТЕЙ

Рубрики

ИКОНА ДНЯ

КАЛЕНДАРЬ

СЧЕТЧИК