Акафисты

АКАФИСТ СВЯТЕЙ БЛАЖЕННЕЙ КСЕНИИ ПЕТЕРБУРЖСТЕЙ

ksp19

Кондак 1

Избранней Богом от жен Российских и призванней на служение Ему во граде святаго Петра, скорой помощнице и молитвеннице нашей, похвальная пения приносим ти, святая блаженная Ксение, любовию чтуще подвиги, терпение и многострадание твоя. Ты же, яко имущая велие дерзновение ко Господу, молися, да избавит ны от всяких бед и скорбей, зовущия:
Радуйся, святая блаженная Ксение, скорая помощнице всем с верою и любовию к тебе притекающим.

Икос 1

Ангелов Творец избpа тя, блаженная, в век уныния и оскудения веры, да тесным и скорбным путем шествующи, победиши страсти мира сего и вслед тебе возсияет радостию и любовию земля наша, и многая чада ея да внидут в Царство Небесное. Мы же, зряще твое дивное богоугодное житие, со благоговением и радостию взываем сице:
Радуйся, благодатию Святаго Духа осиянная;
радуйся, всем женам Российским похвало и радосте.
Радуйся, блаженная, ангельским житием на земли просиявшая;
радуйся, Богом от рождения на служение страждущим избранная.
Радуйся, от юности Христа возлюбившая и Тому от души поработавшая;
радуйся, верная рабо Господня.
Радуйся, града святаго Петра и всея земли Российския сокровище пребогатое;
радуйся, яко тебе славит весь мир христианский.
Радуйся, от глада духовнаго всех нас избавляющая;
радуйся, заповеди Божественныя творити научающая.
Радуйся, в православней вере нас укрепляющая;
радуйся, радосте земли нашея.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 2

Видя Господь чистоту сердца твоего, зане от юности пожила еси в благочестии и хранении заповедей Божиих, благоволи ти сочетатися браком законным и в супружестве целомудренне и богоугодне пожити. Егда же супруг твой Андрей внезапу умре, презрела еси суету земнаго счастия, отреклася еси от всех прелестей земных и возносила еси молитвы своя к Богу, со умилением поющи Ему: Аллилуиа.

Икос 2

Разумела ecи, богомудрая Ксение, яко едино есть на потребу человеком, еже благоугождати Господеви. Сего ради, свободу получивши от брака Божиим смотрением, Христу обручилася еси и Тому Единому возжелала еси поработати усердно, яко верная раба Господня. Мы же, почитающе тя с любовию, поем таковая:
Радуйся, с супругом твоим во всяком благочестии и чистоте пожившая;
радуйся, умом и сердцем к Богу Живому возлетевшая.
Радуйся, богомудрей ользе поревновавшая;
радуйся, Духом Святым умудренная во спасение.
Радуйся, возлюбившая Бога паче всех земных благ;
радуйся, земныя радости ни во чтоже вменившая.
Радуйся, чистотою жития святым подражавшая;
радуйся, многих святых добродетели в себе совокупившая.
Радуйся, в учении и премудрости нас наставляющая;
радуйся, любовию нас согревающая.
Радуйся, жизни по заповедем Божиим нас научающая;
радуйся, в мире живущих ко спасению путеводительнице.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 3

Силою благодати Божия укрепляема, Ксение блаженная, восхотела ecи и оставити дом твой подвига ради иноческаго равноангельнаго жития. Сродници твои убеждаху тя отступити от желания сего, надеявшеся устроити брак твой с земным женихом. Ты же от брака уклонилася ecи, да Единому Небесному Жениху поработаеши, поющи Ему: Аллилуиа.

Икос 3

Имущи огнь любве ко Христу, блаженная, возносила ecи молитвы ко Господу и Его Пречистей Матери, умоляющи открыти тебе, како возможеши послужити Богу, шествующи царским путем Креста Господня. Темже ублажающе тя, вопием ти таковая:
Радуйся, яко в любви к Богу и Его Пречистей Матери обрела ecи радость и утешение;
радуйся, образ любве и чистоты в себе показавшая.
Радуйся, разум просветившая молитвою;
радуйся, и нас во спасение умудряющая.
Радуйся, блуждающих во мраце неверия на путь спасения направляющая;
радуйся, намерение следовати путем тесным в нас укрепляющая.
Радуйся, окамененная сердца наша радостию и любовию обновляющая;
радуйся, мглу сомнений наших разсеявающая.
Радуйся, смирению и кротости Божия Матере подражавшая;
радуйся, крест Христов с терпением и радостию понесшая.
Радуйся, о спасении грешников к Богу и Богородице теплая ходатаице;
радуйся, светильниче многосветлый граду святаго Петра.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 4

Бурю искушений воздвигоша ближнии противу тебе, блаженная, видевше жажду твою послужити Богу в чистоте и правде. Ты же, радости наученная от Божия Матере, препобедила еси вся силою благодати Божия, укреплявши веру в Господа хождением в храм, умиленными молитвами; ныне же с лики победивших мир воспеваеши Христу Богу: Аллилуиа.

Икос 4

Слышав Господь Свою агницу, посла ти во сне преподобную Марию Египетскую, да открыет волю Божию: оставивши дом твой, последовати за Христом, носящи Его поругание и поношение, терпящи напасти, лишения и велия скорби. Дивящеся о таковом промысле Божием, воспеваем ти сице:
Радуйся, все житие твое всесовершенне Богу предавшая;
радуйся, житием твоим суету мира сего обличившая.
Радуйся, яко молитвы твоя услышаны быша Богом;
радуйся, яко сподобилася ecи и увидети во сне преподобную Марию Египетскую.
Радуйся, в церкви дни и нощи молитвенно провождавшая;
радуйся, сердцем умиленным Бога познавшая.
Радуйся, верою и любовию сердца наша просвещающая;
радуйся, ищущим пути ко спасению наставнице благодатная.
Радуйся, молитвами вся искушения победившая;
радуйся, яко житием твоим исполнила ecи вся повеленная тебе от Господа.
Радуйся, на подвиг самоотвержения Христа ради нас призывающая;
радуйся, паче сияния солнечнаго землю нашу любовию озарившая.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 5

яко звезда всесветлая возсияла ecи в Российстей земли, блаженная, егда Христа ради волею оставивши дом, родных и близких, и вся красная мира сего возненавидевши, Бога же Единаго возлюбивши, последовала еси Ему по заповеди: «аще кто хощет по Мне идти, да отвержется себе, и возмет крест свой, и по Мне грядет», поющи Ему: Аллилуиа.

Икос 5

Видевше тя людие богоспасаемаго града святаго Петра яко странну, в мужестей одежде ходящу и Андреем называющуся, дивляхуся. Ты же, блаженная, со апостолом Павлом рекла ecи: «Мы буи Христа ради, вы же мудри о Христе», подвиг многотрудный восприяла ecи, образ юродства и неразумия пред людьми являющи, разум же совершен имущи, в смирении от него отреклася ecи, в сем подвизе до смерти пребывающи. Темже поем ти сице:
Радуйся, буйственное и юродственное жительство избравшая;
радуйся, блаженному Андрею Христа ради юродивому в подвизех подражавшая.
Радуйся, Христа Единаго и Его Пречистую Матерь всем сердцем возлюбившая;
радуйся, вся благая мира сего презревшая.
Радуйся, поношения и укорения Христа ради претерпевшая;
радуйся, славу человечу ни во чтоже вменившая.
Радуйся, образе нищеты духовныя;
радуйся, от суеты мирския нас ограждающая.
Радуйся, юродством глубины премудрости достигшая;
радуйся, в тайне Богу послужившая.
Радуйся, в житии твоем непобедимое мужество показавшая;
радуйся, в терпении гонений, хулений, болезней и скорбей нас укрепляющая.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 6

Проповедница Евангельския кротости, смирения и радости духовныя была ecи, блаженная, дерзновенно исповедующи Христа истиннаго Бога, путь к Нему показующи любовию к людем, укрепляющи веру в малодушных, вразумляющи заблуждшия, отвращающи от греха падшия, научающи подражати тебе и смиренно сердцем и усты непрестанно Богу пети: Аллилуиа.

Икос 6

Возсия свет велий подвигов твоих, блаженная, озаряя благодатию всю Церковь Русскую Православную. Многа бо лета слышала ecи от людей слова уничижения, оскорбления и обид, но молилася ecи за них к Богу, да открыет сердца их к вере и благочестию и наставит на путь истины, призывающи всех к подвигу духовному во славу Господа нашего. Мы же, ведуще о благодатней силе твоей, ублажаем тя песньми таковыми:
Радуйся, терпевшая за Господа поношения и унижения;
радуйся, скорби и страдания нести нам помогающая.
Радуйся, за всех обидимых ко Господу молящаяся;
радуйся, благодатныя слезы покаяния нам дарующая.
Радуйся, Божия избраннице, искушения мира, плоти и диавола победившая;
радуйся, от врагов видимых и невидимых нас защищающая.
Радуйся, злобу добром препобедившая;
радуйся, в мире живущим образе богоугождения.
Радуйся, нищету, лишения и болезни со упованием и радостию терпевшая;
радуйся, сего ради венец светлый от Бога стяжавшая.
Радуйся, подвижником веры во всех делех и начинаниих помогающая;
радуйся, друг друга тяготы носити нас научающая.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 7

Хотя Всеблагий Господь явити в тебе, блаженная, Свое неизреченное к людем милосердие, дивных даров сподоби тя: дара прозорливости и чудотворений, дара молитвы, исцеления недугов, утешения скорбящих, да вси почитают подвиги и труды твоя, воспевающе Богу: Аллилуиа.

Икос 7

Новое чудо показа Господь, егда явилася ecи, блаженная мати Ксение, во сне супрузе смертельно болящаго и рекла ecи, яко муж ея здрав будет и имать родитися у них младенец, да нарекут имя тому Ксения, и будет она хранити семейство от всяких бед. Сице во вся дни жития твоего и доныне дарова тя Господь утешительницу страждущих и вестницу добра. Мы же, ведяще знамения силы Господни, чрез тебе явленная, поем ти таковая:
Радуйся, радость небесную от Бога приявшая;
радуйся, благодатный мир и радость в домы приносящая.
Радуйся, дух мирен стяжати нам помогающая;
радуйся, духовному мужеству нас научающая.
Радуйся, прозорливице, сокровенная сердец человеческих Духом Божиим прозиравшая;
радуйся, дерзновение в молитвах пред Богом за страждущих обретшая.
Радуйся, одержимых страстьми от погибели спасающая;
радуйся, от недуга пиянства страждущих исцеляющая.
Радуйся, тяжко болящаго иноверца от смерти спасшая и к православней вере сего приведшая;
радуйся, кончину императрицы Елисаветы Петровны в праздник Рождества Христова предрекшая.
Радуйся, пламенною молитвою к Богу пламень пожара угасившая;
радуйся, свеще неугасимая, в молитве пред Богом горящая.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 8

Странница бездомная явилася еси, Ксение блаженная, в стольнем граде отечествия твоего, взыскующи града Иерусалима Небеснаго. По имени твоему тако и житие твое: ходила бо еси по земли якоже Христос в земнем Своем житии, не имеющи где главу подклонити. Помози и нам в странствии нашем на многострадальней земли, да отложивше вся суетная, к вечности устремимся, воспевающе Богу: Аллилуиа.

Икос 8

Вся весть Господь и ничтоже есть тайно, еже не открыется, тако и твое благоугодное житие, яко во единей ризе лето и зиму обходила ecи град твой, гладом и жаждею томимая, безмерною тяготою плоть твою изнуряющи и работающи Господеви день и нощь в посте и непрестанных молитвах за род человеческий, да обратятся вси к Богу истинному. Темже убо и нам путь показала ecи, имже шествующе во след Христа, Царствия Небеснаго сподобимся. Мы же, прославляюще великия подвиги твоя, с радостию поем:
Радуйся, странницей в мире пожившая, житием же твоим образ служения Богу явившая;
радуйся, бездомная на земли, дом Духа Святаго в души твоей уготовившая.
Радуйся, зной, стужу и дожди терпевшая, одеянием же души твоея молитву непрестанную имевшая;
радуйся, нищетою твоею нищему Лазарю евангельскому подражавшая.
Радуйся, благодатию Духа Святаго чудесно согреваемая;
радуйся, хлад людских сердец молитвами твоими растопляющая.
Радуйся, созданию церкве Божия тайно послужившая;
радуйся, на верхи церкве тоя нощьми тяжкия ноши камений носившая.
Радуйся, поклоны земныя во вся страны света в поле творившая;
радуйся, бремя грехов людских молитвами твоими облегчающая.
Радуйся, отвержению премудрости века сего юродством твоим нас научающая;
радуйся, подвигом жития твоего и страданием иову многострадальному уподобившаяся.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 9

Всею душею твоею Бога возлюбивши, блаженная, благодать восприяла ecи, недужныя целити, скорбныя утешати, от бед и напастей избавляти, заблуждшия и отчаянныя на путь спасения направляти. Мы же, таковую благодать, тебе от Бога данную, чтуще, вопием Ему: Аллилуиа.

Икос 9

Ветии многовещаннии не возмогут восхвалити дела твоя, блаженная, яко Сам Господь, желая прославити тя на земли, попусти отроку утонути в водах невских. Ты же, видящи неутешное горе матере его, со дерзновением воздела ecи руце твои ко Господу с молитвою: «Да будет жив отрок», и бысть глас с небес: «Иди и твори, яко хощеши!» Тогда прикосновением руки твоея оживила ecи утопшаго отрока в виду матере его. Мы же за таковое дерзновение ублажаем тя песньми сими:
Радуйся, матерей скорбящих утешение;
радуйся, яко по молитвам твоим утопший отрок воскресе.
Радуйся, от суда неправеднаго невинных избавляющая;
радуйся, из темниц молитвами твоими свобождающая.
Радуйся, девицу благочестивую от брака со злодеем спасшая;
радуйся, закоренелых в пороках грозная обличительнице.
Радуйся, яко царице в соннем видении рождение чада прорекла ecи;
радуйся, яко предстательством твоим семейства христианская укрепляются.
Радуйся, недоумевающих мудрая советнице;
радуйся, судьбы Божия предвозвещающая.
Радуйся, помощь страждущим чрез добрых людей подающая;
радуйся, светом добродетелей твоих Бога прославившая.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 10

Спасительнаго подвига ищущи, блаженная, многоскорбное житие избрала ecи любве ради Христовы, ангельски во плоти пожила ecи, мир просвещающи чудесы многими, непрестанно возсылающи усердно молитвы к Богу, да помраченная сердца не познавших истины просветятся благодатию и обратятся к познанию Бога, Владыки и Творца своего, поюще Ему: Аллилуиа.

Икос 10

Стена ecи твердая и ограждение необоримое граду твоему и всей стране нашей Российстей, мати Ксение. Сподобилася бо ecи видети во сне Пресвятую Богородицу, возвестившую, яко скоро Господь призовет тя, блаженная, в Горний Иерусалим, а святыя мощи твоя верующии почитати будут до скончания века. Мы же, видяще исполнение обетования сего и благодатную помощь приходящим ко гробу твоему, с любовию поем тебе:
Радуйся, откровения во сне о кончине своей сподобившаяся;
радуйся, с радостию восприемшая весть о преселении своем на Небо.
Радуйся, носившая на земли венец терновый;
радуйся, унаследовавшая на Небеси венец небесный.
Радуйся, до конца в подвизех служения Богу претерпевшая;
радуйся, от ангелов на Небеси радостно сретенная.
Радуйся, течение страдальческаго пути добре скончавшая;
радуйся, на стезю заповедей Божиих нас наставляющая.
Радуйся, светом добродетелей твоих Бога прославившая;
радуйся, от растления мира сего верных охраняющая.
Радуйся, праваго пути веры и благочестия указательнице;
радуйся, всем требующим покров от Господа подающая.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 11

Пение молебное немолчно бысть при гробе твоем, блаженная, от честнаго успения до дне светлаго прославления твоего, яко гроб твой приснотекущий источник исцелений показа Господь во утверждение православныя веры. Темже и Святая Церковь достойно почитает подвиги и чудеса, тобою творимая, воспевающи Богу: Аллилуиа.

Икос 11

Светоподательный светильник явися в Российстей стране тобою, блаженная. Ты же велию скорбь земли нашея провидела ecи во дни погружения во тьму народа нашего, и место уготовала ecи для исповедников веры православныя на кладбищи Смоленстем и молитвами твоими укрепляла ecи их на жертву во спасение душ многих заблуждших, и обетование победы даровала еси. И ныне на иконе твоей стоиши посреде могил новомучеников российских, призывающи и укрепляющи нас на брань духовную противу духов злобы поднебесных. Темже поем ти:
Радуйся, преславный светильниче Российския земли;
радуйся, исцеления чудная от святых мощей твоих обильно источающая.
Радуйся, житием твоим град святаго Петра освятившая;
радуйся, всем ныне живущим в нем путь ко спасению показавшая.
Радуйся, во Отечествии Небеснем пребывающая;
радуйся, печальнице о людех русских, во отечествии твоем земнем и в разсеянии сущих.
Радуйся, впадших в сети диавольския твоею молитвою свобождающая;
радуйся, в годину скорбей помощь земли нашей подающая.
Радуйся, изнемогающих от уныния и печали скорая утешительнице;
радуйся, сердца всех верных просвещающая.
Радуйся, всех скорбящих и нуждающихся пред Богом предстательнице;
радуйся, яко заступлением твоим избавляемся от праведнаго гнева Божия.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 12

Благодать прияла ecи от Господа к вере истинней приводити, соблюдати от болезней и смерти духовныя всякаго человека, почитающаго тя. Возбуди и нас от сна греховнаго, лености и нерадения, озари ожесточенная сердца светом веры, да чада Бога соделаемся и в радости воспоем Ему: Аллилуиа.

Икос 12

Поюще твое прославление во святых, веруем, яко велие дерзновение и благодать пред Богом имаши. Темже молимся тебе, святая блаженная мати Ксение, молися ко Господу, да избавит страну нашу от глада, труса, потопа, меча, нашествия иноплеменных и междоусобныя брани, да сохранит мир на земли. Мы же с любовию приходяще к честным мощем твоим, со умилением вопием ти сице:
Радуйся, от людей российских благоговейно прославляемая;
радуйся, яко на Небесех с сонмом святых жен российских ныне пред Господем предстоиши.
Радуйся, преподобных и праведных сонаследнице;
радуйся, о всем мире Божием молитвеннице.
Радуйся, цветом нетления украшенная на Небеси;
радуйся, в нынешнем многоскорбнем житии всем нам помощнице теплая.
Радуйся, неизреченныя радости в мире Горнем причастнице;
радуйся, радости той нас научающая.
Радуйся, ревность ко спасению в нас возбуждающая;
радуйся, борющимся со страстьми и похотьми помощнице неутомимая.
Радуйся, к сокрушению и покаянному плачу нас приводящая;
радуйся, велие сокровище Российския земли.
Радуйся, святая блаженная Ксение, скорая помощнице всем с верою и любовию к тебе притекающим.

Кондак 13

О святая блаженная мати Ксение, приими от нас грешных моление сие, тебе возносимое, огради молитвами твоими град твой, отечество наше и вся люди российския от враг видимых и невидимых, от всяких зол, бед и напастей; умоли Господа, да дарует нам силы нести крест наш с радостию и надеждою на спасение, воспевающе с тобою Богу: Аллилуиа.

Этот кондак читается трижды, затем 1-й икос «ангелов Творец…» и 1-й кондак «Избранней Богом от жен Российских…»

МОЛИТВА ПЕРВАЯ

О святая блаженная мати Ксение, под кровом Всевышняго жившая, ведомая и укрепляемая Богоматерию, глад и жажду, хлад и зной, поношения и гонения претерпевшая, дар прозорливости и чудотворения от Бога получившая и под сению Всемогущаго покоящаяся! Ныне предстояще на месте твоего погребения, пред образом твоим святым, яко живей ти сущей с нами, молимся: приими прошения наша и принеси я ко Престолу Милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом святаго крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и успехи в учении им улучити; болящия и недугующия исцели, семейным любовь и согласие ниспосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, народ и страну нашу в мире и безмятежии сохрани, о лишенных в предсмертный час причащения Святых Христовых Таин умоли. Ты бо ecи наша надежда и упование, скорое услышание и избавление, тебе благодарение возсылаем, и с тобою славим Отца и Сына, и Святаго Духа, ныне и присно и во веки веков. Аминь.

МОЛИТВА ВТОРАЯ

О преславная блаженная мати наша Ксение, теплая о нас пред Богом молитвеннице! якоже прежде к надгробию твоему припадавшии, сице ныне и мы по прославлении твоем к нему прибегающе, просим: помолися Господу, да освятит наша души и телеса, да просветит ум, очистит совесть от всякия скверны, нечистых помыслов, лукавых и хульных умышлений и от всякаго превозношения, гордости же и кичения, высокоумия же и дерзости, от всякаго фарисейскаго лицемерия, и от всякаго студнаго и лукаваго обычая нашего; да дарует нам искреннее покаяние, сокрушение сердец наших, смиренномудрие, кротость же и тихость, благоговение, разум же духовный со всяким благоразумием и благодарением. Утаившая себе от мудрых века сего, но Богу знаемая, испроси стране нашей Российстей от бед лютых избавление, соблюди нас в православнем исповедании веры христианския, яко да ублажающе тя сподобимся во вся дни воспевати, благодарити и славити Отца и Сына, и Святаго Духа, Троицу Единосущную, Животворящую и Нераздельную во веки веков. Аминь.

Тропарь, глас 7:

Нищету Христову возлюбивши, / безсмертныя трапезы ныне наслаждаешися, / безумием мнимым безумие мира обличивши, / смирением крестным силу Божию восприяла еси. / Сего ради дар чудодейственныя помощи стяжавшая, / Ксение блаженная, // моли Христа Бога избавитися нам от всякаго зла покаянием.

Кондак, глас 3:

Днесь светло ликует град святаго Петра, / яко множество скорбящих обретают утешение, / на твоя молитвы надеющеся, / Ксение всеблаженная, // ты бо еси граду сему похвала и утверждение.
ksp22
ЖИТИЕ СВЯТОЙ БЛАЖЕННОЙ КСЕНИИ ПЕТЕРБУРГСКОЙ

Добавьте комментарий

Нажмите, чтобы оставить комментарий

ПАМЯТНЫЕ ДАТЫ

24 МАРТА - ДЕНЬ ПАМЯТИ МИТРОПОЛИТА СИМБИРСКОГО И НОВОСПАССКОГО ПРОКЛА
prokl86
БОГОМУДРЫЙ АРХИПАСТЫРЬ. ЧИТАТЬ ДАЛЕЕ...

ПАМЯТНЫЕ ДАТЫ

21 МАРТА (перенос с 22 марта) - СОРОКА МУЧЕНИКОВ, В СЕВАСТИЙСКОМ ОЗЕРЕ МУЧИВШИХСЯ
sevmucl44
О ПОДВИГЕ КРЕСТОНОШЕНИЯ. ЧИТАТЬ ДАЛЕЕ...

НАША СТРАНИЧКА ВКОНТАКТЕ

ДОБРО ПОЖАЛОВАТЬ!

ПАМЯТНЫЕ ДАТЫ

21 МАРТА - ПРИСОЕДИНЕНИЕ КРЫМА К РОССИИ
sevmucl44
21 марта 2014 года — Совет Федерации ратифицировал договор о вступлении Крыма в состав России. Президент России Владимир Путин подписал законы о присоединении Крыма к России. Договор вступил в силу.

ПАМЯТНЫЕ ДАТЫ

ПАМЯТНЫЕ ДАТЫ

15 МАРТА – ДЕРЖАВНОЙ ИКОНЫ БОЖИЕЙ МАТЕРИ
ДЕРЖАВНАЯ ИКОНА БОЖИЕЙ МАТЕРИ. КАЗАНСКАЯ ЦЕРКОВЬ В КОЛОМЕНСКОМ
ДЕРЖАВНАЯ ИКОНА БОЖИЕЙ МАТЕРИ. ЧИТАТЬ ДАЛЕЕ...

ПАМЯТНЫЕ ДАТЫ

ПАМЯТНЫЕ ДАТЫ

9 и 10 МАРТА – ПАМЯТЬ СТАРЦА ПРОТОИЕРЕЯ ВАСИЛИЯ ШВЕЦА
vasshv27
ПРОТОИЕРЕЙ ВАСИЛИЙ ФЕДОСЕЕВИЧ ШВЕЦ. ЧИТАТЬ ДАЛЕЕ...

ПАМЯТНЫЕ ДАТЫ

9 МАРТА - ДЕНЬ КОНЧИНЫ ВЕРЫ НИКОЛАЕВНЫ МАРКОВОЙ
ВЕРА НИКОЛАЕВНА МАРКОВА. МАРТ, 1981 г.
ПАМЯТИ ВЕРЫ НИКОЛАЕВНЫ МАРКОВОЙ. ЧИТАТЬ ДАЛЕЕ...

ПАМЯТНЫЕ ДАТЫ

ПАМЯТНЫЕ ДАТЫ

8 МАРТА – ПАМЯТЬ СТАРЦА АЛЕКСАНДРА ФЕДОРОВИЧА ГРОШЕВА
А. Ф. ГРОШЕВ
ПОСЛЕДНИЙ ХРАНИТЕЛЬ КИРИЛЛО-БЕЛОЗЕРСКОЙ ОБИТЕЛИ. ЧИТАТЬ ДАЛЕЕ...

ПАМЯТНЫЕ ДАТЫ

25 ЯНВАРЯ - ДЕНЬ АНГЕЛА ТАТИАНЫ ВАСИЛЬЕВНЫ ТРОФИМОВОЙ (1886–1934), МАТЕРИ МАРИИ СЕРГЕЕВНЫ ТРОФИМОВОЙ

ЦИТАТА ДНЯ

Тело ищет здравия, чтобы удалиться от Бога

ИКОНА ДНЯ

СПИСОК ВСЕХ СТАТЕЙ

АКАФИСТЫ, СОСТАВЛЕННЫЕ АЛЕКСАНДРОМ ТРОФИМОВЫМ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ИЕРУСАЛИМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ВАЛААМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ПРИБАВЛЕНИЕ УМА»

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОРСУНСКИЯ (ЕФЕССКИЯ)

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОЛОЧСКИЯ

АКАФИСТ СВ. АП. И ЕВ. ИОАННУ БОГОСЛОВУ

АКАФИСТ СВ. МЧЧ. ФЛОРУ И ЛАВРУ

АКАФИСТ СВТТ. АФАНАСИЮ И КИРИЛЛУ, АРХИЕП. АЛЕКСАНДРИЙСКИМ

АКАФИСТ СВТ. ТИХОНУ, ПАТРИАРХУ МОСКОВСКОМУ И ВСЕЯ РОССИИ

АКАФИСТ СВВ. ЦАРСТВЕННЫМ СТРАСТОТЕРПЦЕМ

АКАФИСТ ПРП. ИЛИИ МУРОМЦУ

АКАФИСТ ПРП. АНТОНИЮ ДЫМСКОМУ

АКАФИСТ ПРП. ВАРЛААМУ СЕРПУХОВСКОМУ

АКАФИСТ ПРП. ОТРОКУ БОГОЛЕПУ ЧЕРНОЯРСКОМУ

АКАФИСТ СВ. ПРАВ. ИОАННУ РУССКОМУ

АКАФИСТ ПРП. ПАИСИЮ ВЕЛИЧКОВСКОМУ

АКАФИСТ ПРП. ВАРНАВЕ ГЕФСИМАНСКОМУ

АКАФИСТ СВМЧ. СЕРАФИМУ (ЗВЕЗДИНСКОМУ), ЕП. ДМИТРОВСКОМУ

АКАФИСТ ПРПМЧЧ. СЕРАФИМУ И ФЕОГНОСТУ АЛМА-АТИНСКИМ

АКАФИСТ ПРП. СЕРАФИМУ ВЫРИЦКОМУ

АКАФИСТ СЩМЧ. ЯРОСЛАВУ ЯМСКОМУ

АКАФИСТ ПРП. СИЛУАНУ АФОНСКОМУ

АКАФИСТ СВ. ВМЧЦ. МАРИНЕ

АКАФИСТ СВ. РАВНОАП. ВЕЛ. КН. ОЛЬГЕ

АКАФИСТ ПРП. БЛГВ. КН. ЕВФРОСИНИИ МОСКОВСТЕЙ

АКАФИСТ СВ. ПРАВ. ИУЛИАНИИ МИЛОСТИВЕЙ, ЯЖЕ В СЕЛЕ ЛАЗАРЕВЕ

АКАФИСТ БЛЖ. КСЕНИИ ПЕТЕРБУРЖСТЕЙ

АКАФИСТ ПРПМЦ. ВЕЛ. КН. ЕЛИСАВЕТЕ

АКАФИСТ ВСЕМ СВ. ЖЕНАМ, В ЗЕМЛИ РОССИЙСТЕЙ ПРОСИЯВШИМ

АКАФИСТ СОБОРУ СВ. ВРАЧЕЙ-БЕЗСРЕБРЕНИКОВ-ЦЕЛИТЕЛЕЙ И ЧУДОТВОРЦЕВ

Рубрики

ПОИСК В ПРАВОСЛАВНОМ ИНТЕРНЕТЕ

Поиск в православном интернете: 

КАЛЕНДАРЬ

СЧЕТЧИК