Акафисты

АКАФИСТ ПРЕПОДОБНОМУЧЕНИКАМ СЕРАФИМУ И ФЕОГНОСТУ АЛМА-АТИНСКИМ

sif
Кондак 1

Избраннии страстотерпцы Христовы и мужественнии исповедницы святыя веры православныя, на горах Тяньшанских в жертву Богу себе принесшии и венцы победы от Него приявшии, восхваляем вас, заступников наших, вы же, велие дерзновение ко Господу имущии, от всяких нас бед и скорбей свободите, любовию зовущих:
Радуйтеся, преподобномученицы Серафиме и Феогносте, молитвенницы теплии о душах наших*.

*или: Радуйтеся, преподобномученицы Серафиме и Феогносте, земли Казахския просветители и преславнии чудотворцы.

Икос 1

Ангели земнии и человецы небеснии явистеся, святии преподобномученицы Серафиме и Феогносте, в дому Божия Матере, Глинстей пустыни, жительствовавшии в преподобии и правде. Егда же услышасте глас Учителя своего Христа, призывающий потрудитися во славу Его, отечество и обитель любимую оставивше, на новое многотрудное послушание направили есте стопы ваша, и кровию вашею землю Семиречия освятили есте. Услышите нас, верою и любовию чтуших вас и воспевающих сице:
Радуйтеся, Христа Бога всем сердцем возлюбившии;
радуйтеся, от юности Тому преподобием и правдою послужившии.
Радуйтеся, равноангельно во обители Рождества Пресвятыя Богородицы пожившии;
радуйтеся, все упование ваше на Матерь Божию возложившии.
Радуйтеся, служению Матери Церкви жизнь свою отдавшии;
радуйтеся, ангели земли Российския, на горах Тяньшанских изрядно потрудившиися.
Радуйтеся, столпи непоколебимии Православия;
Радуйтеся, любовию Христовою аки братия по духу соединеннии.
Радуйтеся, на земли за Христа мученически пострадавшии;
радуйтеся, веру, надежду и любовь до конца сохранившии.
Радуйтеся, воини Христовы, от Него славою венчаннии;
радуйтеся, граду Алма-Ате и всей стране Казахстанстей защитницы и покровители.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 2

Видя Господь сердца твоего изволение, от юности избра тя, отче Серафиме, и дарова тебе, еще cущy отроку, ведение пути твоего: мати бо твоя, видящи мученический венец над главою твоею и ангелы, окружающия тя, ужасашеся сердцем и прославляше дивнаго во святых Своих Бога, поющи Ему: Аллилуиа.

Икос 2

Разум Божественный приим от Христа Бога нашего, монашеское житие возлюбил еси, преподобне отче Серафиме, и тихаго пристанища Глинския обители Пречистыя Богородицы достигл еси, идеже душевный твой корабль житейскаго мятежа устранив, явился еси плотию ангел, к Богоматери pуце простирая и светом благодати просвещаяся. Темже от юности избранника Божия тя ведуще, взываем сице:
Радуйся, родителей благочестивых сыне;
радуйся, бывшим о тебе видением матерь твою удививый.
Радуйся, страдания твоя и мученическую смерть смотрением Божиим предуведевый;
радуйся, суету мира сего и вся блага его презревый.
Радуйся, иноческое житие благоугождения ради Богу избравый;
радуйся, постом и воздержанием плоть твою духови покоривый.
Радуйся, сан священный, яко велий дар Божий, приявый;
Радуйся, с благоговением и страхом Божиим безкровную жертву приносивый.
Радуйся, дивную крепость духа в скорбех показавый;
радуйся, яко всего себе в жертву за чада твоя принесл еси.
Радуйся, тезоименитому тебе преподобному Серафиму, Саровскому чудотворцу, в подвизех поревновавый;
радуйся, яко Серафим пламенный, ревностно по Бозе непрестанно горевый.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 3

Силою Божественною укрепляемии, отцы преподобнии, вся послушания монастырская добре проходили есте под руководством богомудрых Глинских старцев, от силы в силу восходяще, и труды великия подъяли есте, во еже подвигом иночества Православие в земли нашей утвердити. Мы же, поминающе таковую ревность вашу к подвигом духовным, прославляем вас, поюще Богу: Аллилуиа.

Икос 3

Имуще в сердцах ваших веру несумненну во Христа и силою тоя вооружившеся, смотрением Божиим в дальний край державы Российския направили есте стопы ваша, преподобнии отцы Серафиме и Феогносте, вкупе с братиями обители Глинския Анатолием, Ираклием и Пахомием, благовестити слово Божие во странах Востока, и достигли есте Свято-Троицкия обители Семиречия, да прославится Церковь Божия и вера православная и да возрастают людие страны сея в вере истинней и добрем житии. Темже ублажаем вас сице:
Радуйтеся, в послушании отцем духовным и великим старцем Глинским пребывшии;
радуйтеся, во иноческих трудех и подвизех им подражавшии.
Радуйтеся, обители Глинския дивное украшение;
радуйтеся, сердца ваша во обитель Духа Святаго устроившии.
Радуйтеся, Божиим велением во обитель Святыя Троицы на Иссык-Куле вселившиися;
радуйтеся, многих тамо своим праведным житием удивившии.
Радуйтеся, в дальния страны с Евангельским благовестием пришедшии;
радуйтеся, Слово Жизни людем возвестившии.
Радуйтеся, Пресвятыя Троицы вернии угодницы;
радуйтеся, Пресвятыя Богородицы избраннии служители.
Радуйтеся, светильницы отечества нашего;
радуйтеся, подвиги и чудесы своими веру православную в нем утверждающии.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 4

Бурю лютых искушений воздвиже на вас враг рода человеческаго, егда Господь Бог, очищая скорбьми и и напастьми избранныя Своя, попусти разорити новоустроеную обитель Свято-Троицкую, на нюже внезапу нападоша агаряне и многих братий, в ней бывших, мечным посечением убиша. Вы же, преподобнии отцы Серафиме и Феогносте, Богом храними, из обители разоренныя до богоспасаемаго града Вернаго дошедше, с молитвою и благоговением прияли есте новый жребий служения, призывающе людей к свету истины и правды вечныя. Темже ныне вся земля наша, почитающи мученический подвиг братии вопиет прославльшему вас Богу: Аллилуиа.

Икос 4

Слышавше, преподобнии отцы, похвалы о себе и славы, яже от человек не терпяще, паки пустыннаго безмолвия возжелали есте, и обретше удобное место на горе, сотворили есте руками своими келии, и храм во имя преподобнаго Серафима Саровскаго устроили есте в урочище Медео, идеже равноангельным житием просияли есте. Сего ради, взирающе на подвиги ваша, со умилением вопием вам таковая:
Радуйтеся, огненное испытание, от Господа посланное, претерпевшии;
радуйтеся, смотрением Божиим от смерти спасеннии.
Радуйтеся, мужеством вашим диавола посрамившии;
радуйтеся, силою Божественною укрепляемии.
Радуйтеся, во граде Вернем Христу верно послужившии;
радуйтеся, яко Богом наставляемии, пустыни горныя достигли есте.
Радуйтеся, иноческий скит в горах Аксайских устроившии;
радуйтеся, храм во имя преподобнаго Серафима тамо воздвигшии.
Радуйтеся, великим пустынником Фиваиды Русския поревновавшии;
радуйтеся, души ваша от страстей очистившии.
Радуйтеся, всех христиан земли нашея велие утешение;
радуйтеся, от нашествия иноплеменник нас ограждающии.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 5

Божественною силою укрепляем, незлобиво восприял еси чашу поругания, отче Серафиме, егда архиерей обеща запретити тя в служении и лишити мантии, зане, болезнуя о судьбе сестер обители, тобою окормляемыя, воспротивился еси неправедному изгнанию игумении ея. Ты же, веруя слову дивеевския старицы, яко не попустит Господь твоего запрещения, во смирении и радости пел еси Ему: Аллилуиа.

Икос 5

Видевше преподобнии отцы странное и дивное видение, в темную бо и тихую нощь возсия чудный свет на верху горы в урочище Кызылжар, обаче Божие в оном откровение уразумевше, на создание скита вас благословляющее, келии тамо ископаша и церковь Божию устроиша ради утешения и радости всем любящим иноческое пустынное житие. Мы же, прославляюще вас, с любовию поем таковая:
Радуйтеся, образ твердаго стояния за правду Христову нам показавшии;
радуйтеся, имене ради Христова поношение от человек понесшии.
Радуйтеся, терпением во скорбех и гонениих древнему иову подражавшии;
Радуйтеся, всех за истину гонимых прибежище.
Радуйтеся, Свет Пренебесный на верху горы узревшии;
радуйтеся, иноческий скит на месте, Богом указаннем, устроившии.
Радуйтеся, яко гора сия аки вторый Синай в стране Казахстанстей прославися;
радуйтеся, всю землю нашу светом добродетелей своих озарившии.
Радуйтеся, сосуди избраннии благодати Божия;
радуйтеся, тьму неверия светом Христовых заповедей просвещающии.
Радуйтеся, свет Божественнаго учения в сердцах своих носившии;
радуйтеся, путь к сему дивному свету нам показующии.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 6

Проповедницы истиннаго благочестия и возвестители пути спасительнаго, вернии хранители отеческих преданий, столпи непоколебимии явилися есте, преподобнии отцы, добродетельми бо вашими проповедасте во странах Востока веру истинную православную, возгревающе в сердцах людей любовь ко Господу. Темже и нас любви ко Христу научаете, поющих Ему: Аллилуиа.

Икос 6

Возсияли есте в пустыни, преподобнии отцы Серафиме и Феогносте, яко светила многосветлая, тьму неведения и уныния от приходящих к вам отгоняюще, и просветили есте лучами ваших подвигов землю нашу, и многих сердца к богоугодному житию направили есте. Темже и мы, грешнии и тьмою страстей помраченнии, во свете славных деяний ваших, яко пастырей и просветителей наших вас ублажающе, зовем сице:
Радуйтеся, на горе Кызылжарстей яко солнце возсиявшии;
радуйтеся, горы и холмы благоухания исполнившии.
Радуйтеся, скитскаго жития ревнители;
радуйтеся, яко злато искусившиися в горниле пустынножительства.
Радуйтеся, строгих уставов иноческих блюстители;
Радуйтеся, благочестивым житием вашим многих ко спасению приведшии.
Радуйтеся, покаянными слезами пламень страстей угасившии;
радуйтеся, любве и милосердия ко всем людем исполненнии.
Радуйтеся, непрестанною молитвою на высоту безстрастия возшедшии;
радуйтеся, молитве сердечней нас научающии.
Радуйтеся, свет миру и соль земли нашея бывшии;
радуйтеся, яко и мы грешнии имена ваша с верою призываем.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 7

Хотя Человеколюбец Господь явити вас светильники державы нашея, не под спудом, а на свещнице высоце поставленыя, яви вас не точию наставники иночествующих, но такожде боговещанныя проповедники, возвестившия имя Божие в странах Семиречия. Темже соделастеся отцы верующих земли нашея, разсеянных по странам Востока вдали от святынь Православия, от вас научающихся воспевати истинному Богу: Аллилуиа.

Икос 7

Новых пустынножителей яви вас Господь, вы бо любве ради Христовы яко ангели на земли пожили есте, отцем древним подражающе, бдением и пощением тело свое изнуряюще, поучающе чада ваша достойно ходити во след Христу. Темже украси Господь вас небесными даровании и вечныя жизни сподоби. Молитеся неотступно, отцы преподобнии, о градех и весех земли, идеже житие и подвиг ваш совершисте, и приимите нашу песнь хвалебную:
Радуйтеся, страны нашея просветители;
радуйтеся, вернии делатели винограда Христова.
Радуйтеся, благих обычаев и преданий святоотеческих ревнители;
радуйтеся, добрии пастыри, Пастыреначальнику своему Христу подражавшии.
Радуйтеся, монашествующих в подвизе добром укрепляющии;
радуйтеся, о любящих и чтущих вас предстатели.
Радуйтеся, на подвиг самоотвержения Христа ради и нас наставляющии;
радуйтеся, сердца малодушных в вере укрепляющии.
Радуйтеся, суетныя радости презирати нас научающии;
радуйтеся, к Горнему миру ум наш возводящии.
Радуйтеся, яко молитвами вашими от врагов Церковь Божию ограждаете;
радуйтеся, новии светильницы веры, во дни наша верный путь к Богу указующии.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 8

Странное чудо явися на тебе, преподобномучениче Серафиме: егда во святем храме coвершал еси пред Престолом Господним Божественную службу, видеша тя чада духовная осияннаго светом благодати, яко ангела. Сего ради благодаряще Бога о таковой благодати, на тебе почившей, преподобне, радостным сердцем взываем Ему: Аллилуиа.

Икос 8

Вecь серафимским пламенем любве ко Господу горяй и чистоту стяжавый сердечную, отче Серафиме, Христов адамант веры был еси на земли Казахстей. Темже молим тя, обнови окамененная сердца наша, оскудевшая любовию, да тя купно с сомолитвенником твоим преподобным Феогностом восхвалим сице:
Радуйся, Серафиме, от юности твоея добродетели христианския стяжавый;
радуйся, Феогносте, любве ради Христовы во обитель иноческую вселивыйся.
Радуйся, Серафиме, образе кротости и послушания;
радуйся, Феогносте, тесный путь спасения избравый.
Радуйся, Серафиме, инокинем обители града Вернаго наставниче богомудрый;
радуйся, Феогносте, ум твой, сердце и волю в Бозе молитвенно утвердивый.
Радуйся, Серафиме, духовныя мудрости источниче живоносный;
радуйся, Феогносте, во след Христа неуклонно шедый.
Радуйся, Серафиме, огнем веры и любве к Богу и ближним пламеневый;
радуйся, Феогносте, яко Божий воистину служитель явился еси.
Радуйся, Серафиме, прежде смерти о убивающих тя моливыйся;
радуйся, Феогносте, преподобных честное украшение.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 9

Весь был еси объят трепетом, отче Серафиме, егда сподобился еси в день убиения Государя дивнаго видения усопшаго старца Глинския пустыни иеромонаха Домна, иже возвести тебе, яко велия испытания грядут на державу Российскую и Церковь Православную. Ты же, преподобне, вкупе с братией скита прославлял еси истинную Державную Владычицу нашу Богородицу, да умолит Сына Своего и Бога сохранити страну нашу и люди, поя Ему: Аллилуиа.

Икос 9

Ветии многовещаннии не возмогут воистину изрещи величие подвига вашего, святии отцы Серафиме и Феогносте, вы бо яко агнцы Божии по образу Христову отдали есте себе в жертву на заколение: безумнии богоборцы, мняще богатство обрести в келиях ваших, о убийстве вашем умыслиша. Вы же, преподобнии, мученическую смерть от тех приявше и тако скончавше подвиг страданий, от Бога нетленныя венцы улучисте. Сего ради и мы, поминающе кровь вашу, мученически за Христа пролиянную, с любовию зовем:
Радуйтеся, подвиг жизни славно скончавшии;
радуйтеся, веру Христову до конца соблюдшии.
Радуйтеся, в Горних селениих у Господа пребывающии;
радуйтеся, силу Христову пред нечестивыми и безбожными явившии.
Радуйтеся, страстотерпцы Христовы, кровь свою за Церковь и веру истинную пролившии;
радуйтеся, братолюбием злобу побеждати нас научающии.
Радуйтеся, гонимых за правду в подвизе укрепляющии;
радуйтеся, обретшии путь к жизни вечней.
Радуйтеся, всех верных стояти до смерти за православную веру научающии;
радуйтеся, яко ныне предстоите Престолу Святыя Троицы.
Радуйтеся, покровом Пресвятыя Богородицы осененнии;
радуйтеся, добропобеднии воини Церкве Христовы.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 10

Спасения подвиг добре совершив, Серафиме богооблаженне, еще в жизни сей утешал еси чада твоя, глаголя, яко разлучаяся с ними телесно, не отступен духом будеши от них и места подвигов твоих, и завещал еси верным притекати в горний скит Кызылжарский к могилам исповедников веры православныя, идеже ты невидимо пребываеши вкупе с братом твоим Феогностом, помогая всем призывающим вас в помощь и вопиющим Богу: Аллилуиа.

Икос 10

Стена еси всем православным, к вам с верою притекающим, двоице всехвальная и досточудная, преподобнии отцы Серафиме и Феогносте, ибо Небесе и земли Творец ходатайством вашим утоляет праведный гнев Свой, поражающий нас во дни сия, егда многия беды приидоша на отечество наше, да избавльшеся от сих благодарственно воспоем вам:
Радуйтеся, явлением чудес от мощей ваших Церковь Русскую возвеселившии;
радуйтеся, находящихся в разсеянии российских людей духовно укрепляющии.
Радуйтеся, яко святое место, вами избранное, не оставляти повелели есте;
радуйтеся, и по смерти вашей от паствы своея любовию не отлучившиися.
Радуйтеся, молитвами вашими о просвещении духовнем страны нашея Господа умоляющии;
радуйтеся, печальницы земли нашея.
Радуйтеся, заповеди Божии исполнившии и иных научившии;
радуйтеся, сего ради велии в Царствии Небеснем нареченнии.
Радуйтеся, апостольскому служению причастницы;
радуйтеся, наставницы иноком и собеседницы ангелом.
Радуйтеся, в сонме святых мученик водворившиися;
радуйтеся, со всеми святыми, в земли Российстей просиявшими, торжествующии.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 11

Пение благодарственное Богу приносяще, притекают ныне на гору Кызылжарскую к месту подвигов ваших священницы и мирстии, богатии и убозии, ближнии и дальнии; всяк возраст и пол, яко от неизчерпаемаго источника, по коегождо своей потребе приемлюще благодатную помощь, прославляют и величают Господа, таковую благодать нам даровавшаго, поюще Ему: Аллилуиа.

Икос 11

Свет радости возсия в земли нашей, егда смотрением Божиим прослави Церковь Православная в лице святых светозарную двоицу: Серафима – пламенеющаго и Феогноста – Богом знаемаго наименованных, разгоняющих тьму неверия и озлобления, просвещающих землю нашу светом веры Христовы. Сего ради светлую память вашу и всех новомучеников Казахстанских благоговейно празднующе, устранимся ныне всех распрей и раздоров, единение дуxa в союзе мира и любве соблюдающе, и воспоим святым отцем нашим тако:
Радуйтеся, яко похвальными венцы Русская Церковь вас венчает;
радуйтеся, яко имена ваша написана суть на Небесех в Книзе Жизни.
Радуйтеся, граждане отечества земнаго;
радуйтеся, путеводители наши во Отечество Небесное.
Радуйтеся, силу чудотворений от Бога приявшии;
радуйтеся, яко вашими молитвами грешнии к покаянию воздвизаются.
Радуйтеся, яко честна пред Господем кончина ваша, преподобнии;
радуйтеся, светильницы пресветлии, на свещнице церковнем поставлении.
Радуйтеся, обитель Глинскую прославлением вашим возрадовавшии;
радуйтеся, подвизающимся в ней спасения душевнаго ходатаи.
Радуйтеся, помраченныя умом к свету призывающии;
радуйтеся, яко звезды, озаряющии тьму жизни нашея.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 12

Благодатию обильною исполняется земля Российская, Дом Божия Матере именуемая и в последняя времена сия кровию новомучеников омытая. Такожде и землю Казахскую не остави заступлением Своим Господь, понеже прослави вас, славнии преподобномученицы и чудотворцы Серафиме и Феогносте. Темже молим вас, молитеся ко Господу неотступно о градех и весех земли, идеже житие и подвиг ваш совершисте, испросите обители Глинстей и живущим в ней тишину и радость и всем верным спасение, да воспоим Богу песнь вечную: Аллилуиа.

Икос 12

Поюще преславную память вашу, восхваляем вас, преподобномученицы Серафиме и Феогносте, вы бо, велие дерзновение имуще, всем просящим ныне утешение и помощь подаете, да вси поминаем любовь вашу к пастве своей, юже при жизни и по смерти показасте, и покланяемся с любовию мощем вашим, пред нимиже яко живым вам сушим с нами радостно взываем:
Радуйтеся, пресветлыя звезды, от России возсиявшия и к Востоку пришедшия;
радуйтеся, Церковь Русскую Православную в земли Казахстей собою укрепляющии.
Радуйтеся, за исповедание Христа от врагов Его убиеннии;
радуйтеся, в сонме новомучеников Российских прославленнии.
Радуйтеся, яко место подвигов и страданий ваших ныне обновися;
радуйтеся, яко в день памяти вашея на месте том мнози вернии людие на всяко лето собираются.
Радуйтеся, многими скорбьми вшедшии в радость Господа своего;
радуйтеся, научающии нас радоватися о Господе.
Радуйтеся, за обидимых и унижаемых соотечественников ваших ходатаи;
радуйтеся, яко вашими молитвами православнии народи земли нашея во едино братство соединяются.
Радуйтеся, поборницы крепции за державу Российскую;
радуйтеся, со всеми святыми, Богу угодившими, участь и наследие обретшии.
Радуйтеся, преподобномученицы Серафиме и Феогносте, молитвенницы теплии о душах наших.

Кондак 13

О святии преподобномученицы Серафиме и Феогносте, Горняго Иерусалима ныне граждане, славнии сынове отечества Российскаго, ихже посла Господь в землю Семиречия, идеже верными быти Богу люди наставляюще, мучения и смерть прияли есте. И ныне вкупе с собором новомучеников Российских Святей Троице предстояще, от всяких находящих на нас бед свободите, в мире и единодушии соблюдите и к Царствию Небесному приведите всех во умилении и радости о вас поющих Богу: Аллилуиа.

Этот кондак читается трижды, затем 1-й икос: «Ангели земнии …» и 1-й кондак: «Избраннии страстотерпцы …»

МОЛИТВА

О богоблаженная двоице друзей Христовых, преподобнии страстотерпцы Серафиме и Феогносте! Казахстанския страны светильницы достохвальнии, града Алма-Аты защитницы и покровители богодарованнии, всех православных неусыпнии наставницы! На Небеси богопросвещенными душами вашими Престолу Божию предстоящии, на земли же мученически за Христа пострадавшими телесы вашими на горах Заилийских почивающии и различная дарования духовная всем с верою и любовию к вам приходящим источающии! Милостивно призрите на люди, святую память вашу почитающия, на месте исповеднических подвигов и преподобнических трудов ваших святый гроб ваш обстоящия и теплаго вашего ко Господу ходатайства во обдержащих нуждах просящия. Вси бо мы по множеству грехов наших не дерзаем возвести на небо очес наших, долу поникших, вы же, яко стяжавшии дерзновение ко Господу и ныне со ангелы Ему предстоящии, приинесите о нас благоуханныя молитвы ваша, во еже избавитися нам от глада, потопа, труса, огня, меча, нашествия иноплеменник и междоусобныя брани, от всякия скорби, зол и болезней душевных и телесных, от людей и диавола по нашим грехом бывающих. Да сих избежавше, Господу усердно работающе, молитвами вашими и теплым предстательством внидем в нескончаемый покой Царства Небеснаго и тамо с вами и лики всех святых прославим великое имя Святыя Троицы, Отца, и Сына, и Святаго Духа во веки веков. Аминь.

ПРЕПОДОБНОМУЧЕНИКАМ СЕРАФИМУ И ФЕОГНОСТУ

Тропарь, глас 1:

Любве ради Христовы отечество свое оставльше, / вся мира сего красная, яко скороисчезающая, презревше, / Горняго Иерусалима взыскующе, / на горах Тянь-Шаня подвиги благочестия Святую Троицу прославили есте, / и венцы добропобеднаго мученичества украсившеся, / граду Алма-Ате богодарованнии покровители явилися есте, / преподобномученицы Серафиме и Феогносте, / Православия мужественнии исповедницы./ Темже и мы, духовная чада ваша, / любовию вопием: / слава Давшему вам крепость, / слава венчавшему вас, // слава Подающему вами милости и исцеления.

Тропарь, глас 4:

Днесь светло красуется и веселится страна Казахстанская, / се бо светильники велия в ней Христос показа, / двоицу иноков, Богом посланных, Серафима и Феогноста, / тии бо равноангельным житием просияша и венец мученический доблественне прияша. / Темже Христа Бога воспоим / и Пречистую Его Матерь возблагодарим, // яко дароваша нам преподобномучеников и молитвенников о душах наших.

Кондак, глас 2:

Благое иго Христово на себе восприимше, / и легкое бремя Его любовию облобызавше, / житием своим агнца Божия проповедавше, / за истину радующеся пострадали есте, / и в покой небесный прешедше, / с лики святых Престолу Божию предстоите, / преподобномученицы Серафиме и Феогносте, / граду Алма-Ате испросите мир // и всем чтущим вас велию милость.

Кондак, глас 8:

Православия светильницы и истиннаго благочестия вернии проповедницы,/ Христа ради пострадавшии и венцем славы на Небеси украшеннии, / блаженна земля, орошенная кровьми вашими и приимшая телеса ваша, / святии преподобномученицы Серафиме и Феогносте. / Темже со ангелы и всеми спострадавшими с вами предстояще Христу Богу, // молитеся непрестанно о всех нас.

ЖИТИЕ СВЯТЫХ ПРЕПОДОБНОМУЧЕНИКОВ СЕРАФИМА И ФЕОГНОСТА АЛМА-АТИНСКИХ

©Акафист составлен А. Трофимовым

Добавьте комментарий

Нажмите, чтобы оставить комментарий

ПАМЯТНЫЕ ДАТЫ

18 МАРТА – НАЧАЛО ВЕЛИКОГО ПОСТА
post
ВЕЛИКИЙ ПОСТ. ЧИТАТЬ ДАЛЕЕ…

ПАМЯТНЫЕ ДАТЫ

ПЕРВАЯ СЕДМИЦА ВЕЛИКОГО ПОСТА
post3
ПЕРВАЯ СЕДМИЦА ВЕЛИКОГО ПОСТА. ЧИТАТЬ ДАЛЕЕ…

К 100 ЛЕТИЮ МАРИИ СЕРГЕЕВНЫ ТРОФИМОВОЙ. ЦИТАТЫ ИЗ ДНЕВНИКОВ

К 100 ЛЕТИЮ МАРИИ СЕРГЕЕВНЫ ТРОФИМОВОЙ
К 100 ЛЕТИЮ МАРИИ СЕРГЕЕВНЫ ТРОФИМОВОЙ.
ЦИТАТЫ ИЗ ДНЕВНИКОВ

ПРЕПОДОБНЫЙ СТАРЕЦ АЛЕКСИЙ (СОЛОВЬЕВ)

Старец Алексий жил в Сергиевом Посаде, когда по указанию безбожной власти начали вскрывать мощи святых. Старец печалился об этом и много молился, недоумевая – почему Господь попускает совершаться такому злу? Однажды вечером, когда он совершал молитвенное правило, рядом с ним встал прп. Сергий Радонежский и сказал:
– Молись три дня и постись, и после этого я скажу тебе то, что
нужно.
В следующие два дня, когда отец Алексий молился, снова вставал с ним рядом прп. Сергий. Отец Алексий питался в эти дни одной просфорой. На третий день преподобный сказал:
– Когда подвергаются такому испытанию живые люди, то необходимо, чтобы этому подвергались и останки людей умерших. Я сам отдал тело свое, чтобы град мой во веки был цел.

2 МАЯ 2001 г. ОСВЯЩЕНИЕ ЧАСОВНИ СВ. МАТРОНЫ В Г. СХОДНЯ

ПАМЯТНЫЕ ДАТЫ

17 МАРТА – НЕДЕЛЯ СЫРОПУСТНАЯ. ПРОЩЕНОЕ ВОСКРЕСЕНЬЕ. ЗАГОВЕНЬЕ НА ВЕЛИКИЙ ПОСТ
ПРАОТЕЦ АДАМ. ФРЕСКА. КОНСТАНТИНОПОЛЬ. 1416-1321 гг.
ПРОЩЕНОЕ ВОСКРЕСЕНЬЕ. ЧИТАТЬ ДАЛЕЕ…

ПАМЯТНЫЕ ДАТЫ

ПАМЯТНЫЕ ДАТЫ

14 МАРТА – ДЕНЬ АНГЕЛА АНТОНИНЫ СЕРГЕЕВНЫ ОРЛОВОЙ (ТРОФИМОВОЙ)

АНТОНИНА СЕРГЕЕВНА ОРЛОВА (ТРОФИМОВА). ЧИТАТЬ ДАЛЕЕ…

ПАМЯТНЫЕ ДАТЫ

13 МАРТА – ПРЕПОДОБНЫЕ МАРИНА И КИРА БЕРИЙСКИЕ

ПРЕПОДОБНЫЕ МАРИНА И КИРА БЕРИЙСКИЕ. ЧИТАТЬ ДАЛЕЕ…

ПАМЯТНЫЕ ДАТЫ

10 МАРТА – 70 ЛЕТ СО ДНЯ КОНЧИНЫ СТАРЦА ЗОСИМОВОЙ ПУСТЫНИ ИЕРОСХИМОНАХА ИННОКЕНТИЯ (ОРЕШКИНА; 05.06.1870–10.03.1949)
ИЕРОСХИМОНАХ ИННОКЕНТИЙ (ОРЕШКИН)
ИЕРОСХИМОНАХ ИННОКЕНТИЙ (ОРЕШКИН ИВАН ИГНАТЬЕВИЧ). ЧИТАТЬ ДАЛЕЕ…

ВЕЧЕР ПАМЯТИ МАРИИ СЕРГЕЕВНЫ ТРОФИМОВОЙ

ДЕНЬ АНГЕЛА МАРИИ СЕРГЕЕВНЫЙ ТРОФИМОВОЙ

25 ИЮЛЯ — ДЕНЬ АНГЕЛА МАРИИ СЕРГЕЕВНЫ ТРОФИМОВОЙ

29 МАРТА — ДЕНЬ ПАМЯТИ МАРИИ СЕРГЕЕВНЫ ТРОФИМОВОЙ

ПАМЯТНЫЕ ДАТЫ. К 100 ЛЕТИЮ МАРИИ СЕРГЕЕВНЫ ТРОФИМОВОЙ

О МЕСЯЦЕ МАРТЕ

Мама жила в ритме природы, постоянно любовалась своим садом в разное время года, специально выходила помолиться среди кустов и деревьев. В течение многих лет она делала выписки из разных книг и статей по народному календарю: там были сведения о приметах погоды в связи с церковным календарем, о прилете и отлете птиц, о свойствах и красоте цветов, деревьев и других растений, а также камней и минералов. Мы постоянно выписывали журнал «Наука и жизнь», из которого мама вырезала и подшивала ежемесячные заметки о природе и календаре. Из того, что собрала мама, можно было бы составить интереснейшую книгу. Все эти материалы были постоянно «в ходу»: когда приходили очередные посетители, мама открывала раздел своего собрания, соответствующий месяцу, неделе и даже конкретному дню и начинала читать выдержки. В такие минуты я не выдерживал, оставлял все свои дела и присоединялся к слушателям…

К сожалению, размеры книги не позволяют опубликовать интереснейшие сведения, которые собрала мама по народному календарю. Поэтому вниманию читателей предлагается лишь один календарный месяц – март. Весна была любимым временем года, а март – любимым ее месяцем, недаром в нем совершились столько важнейших событий ее жизни. 21 марта родился я, в марте сделали маме серьезную операцию, в марте умер мой отец, в марте отошла в вечность и мама. Она знала, что уйдет из жизни в марте, знала даже число – 29-е, о чем сохранились такие свидетельства: за день до смерти она попросила меня снять все деньги с ее пенсионной книжки, чтобы не нужно было потом ходить по инстанциям и оформлять наследство (и здесь, даже перед лицом смерти она думала о том, как избавить сына от лишних хлопот). Сохранился листок с выпиской из церковного календаря, сделанный рукой мамы: на нём записаны даты от 27 до 31 марта с указанием памяти святых каждого дня. Сделана эта запись много лет назад, еще до смерти отца, и именно в этом интервале умерли отец (27 марта) и мама (29 марта – день памяти мученика Трофима).

О МЕСЯЦЕ МАРТЕ. ЧИТАТЬ ДАЛЕЕ

МАРТ. ДЕНЬ ЗА ДНЕМ. ЧИТАТЬ ДАЛЕЕ

А. Трофимов

ИСТОРИЧЕСКИЙ КАЛЕНДАРЬ

О МОЛИТВЕ

http://alexandrtrofimov.ru/wp-content/uploads/2014/05/7mol10.jpg

Дорогие посетители сайта, пришло время вспомнить и восстановить древнюю ветхозаветную и апостольскую традицию – семиразовую молитву в течение суток, совершаемую каждые три часа (в 6, 9, 12, 15, 18, 21, 24 часа). Эта молитва особенно действенна в условиях испытания, посланного нам – угрозы распространения коронавирусной инфекции.
Предлагаю Вам ознакомиться с главой из книги «РИТМЫ ЦЕРКОВНОГО ГОДА», написанной много лет назад и размещенной на этом сайте: О СЕМИРАЗОВОЙ МОЛИТВЕ В ТЕЧЕНИЕ СУТОК. ЧИТАТЬ ДАЛЕЕ… http://alexandrtrofimov.ru/?p=766
В ней дается историческое и богословское обоснование необходимости этой молитвы. Сейчас, в условиях карантина православным людям совсем не сложно включиться в этот молитвенный ритм.
Присоединяйтесь к ежедневной семиразовой молитве, рассылайте текст статьи и сообщения о ней своим друзьям и знакомым.
***
Святейший Патриарх Кирилл благословил молитву, которую уже произносят за богослужением во всех православных храмах, ее можно присоединить к семиразовой молитве:
МОЛИТВА ВО ВРЕМЯ РАСПРОСТРАНЕНИЯ ВРЕДОНОСНОГО ПОВЕТРИЯ ЧТОМАЯ
Господи Боже наш, не вниди в суд с рабы Твоими, и огради нас от губительнаго поветрия на ны движимаго. Пощади нас смиренных и недостойных рабов Твоих в покаянии с теплою верою и сокрушением сердечным к Тебе милосердному и благопременительному Богу нашему припадающих и на милость Твою уповающих. Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.
Александр Трофимов

ПАМЯТНЫЕ ДАТЫ

25 ЯНВАРЯ - ДЕНЬ АНГЕЛА ТАТИАНЫ ВАСИЛЬЕВНЫ ТРОФИМОВОЙ (1886–1934), МАТЕРИ МАРИИ СЕРГЕЕВНЫ ТРОФИМОВОЙ

23 ФЕВРАЛЯ – ПАМЯТЬ ПОЭТА ДАВИДА САМОЙЛОВА

«БЫЛА ТУМАННАЯ ВЕСНА…» СТИХИ ДАВИДА САМОЙЛОВА, МУЗЫКА НЕИЗВЕСТНОГО АВТОРА, ИСПОЛНЯЕТ ЛЕОНИД ЭРДМАН

Помощь в издании книг

Благодарю за любую Вашу помощь! Присылайте Ваши имена для молитвенного поминовения на электронную почту atrofimovmail@yandex.ru

НАША СТРАНИЧКА ВКОНТАКТЕ

ДОБРО ПОЖАЛОВАТЬ!

Наша страничка в facebook

Video

3 ноября – ПАМЯТЬ ПРЕПОДОБНОМУЧЕНИКА НЕОФИТА (ОСИПОВА) – ЛИЧНОГО СЕКРЕТАРЯ ПАТРИАРХА ТИХОНА

АКАФИСТ СВЯТЕЙ ПРЕПОДОБНОМУЧЕНИЦЕ ВЕЛИЦЕЙ КНЯГИНЕ ЕЛИСАВЕТЕ

Грек Зорба

Грек Зорба

АКАФИСТЫ, СОСТАВЛЕННЫЕ АЛЕКСАНДРОМ ТРОФИМОВЫМ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ИЕРУСАЛИМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ ВАЛААМСКИЯ

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ПРИБАВЛЕНИЕ УМА»

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОРСУНСКИЯ (ЕФЕССКИЯ)

АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ КОЛОЧСКИЯ

АКАФИСТ СВ. АП. И ЕВ. ИОАННУ БОГОСЛОВУ

АКАФИСТ СВ. МЧЧ. ФЛОРУ И ЛАВРУ

АКАФИСТ СВТТ. АФАНАСИЮ И КИРИЛЛУ, АРХИЕП. АЛЕКСАНДРИЙСКИМ

АКАФИСТ СВТ. ТИХОНУ, ПАТРИАРХУ МОСКОВСКОМУ И ВСЕЯ РОССИИ

АКАФИСТ СВВ. ЦАРСТВЕННЫМ СТРАСТОТЕРПЦЕМ

АКАФИСТ ПРП. ИЛИИ МУРОМЦУ

АКАФИСТ ПРП. АНТОНИЮ ДЫМСКОМУ

АКАФИСТ ПРП. ВАРЛААМУ СЕРПУХОВСКОМУ

АКАФИСТ ПРП. ОТРОКУ БОГОЛЕПУ ЧЕРНОЯРСКОМУ

АКАФИСТ СВ. ПРАВ. ИОАННУ РУССКОМУ

АКАФИСТ ПРП. ПАИСИЮ ВЕЛИЧКОВСКОМУ

АКАФИСТ ПРП. ВАРНАВЕ ГЕФСИМАНСКОМУ

АКАФИСТ СВМЧ. СЕРАФИМУ (ЗВЕЗДИНСКОМУ), ЕП. ДМИТРОВСКОМУ

АКАФИСТ ПРПМЧЧ. СЕРАФИМУ И ФЕОГНОСТУ АЛМА-АТИНСКИМ

АКАФИСТ ПРП. СЕРАФИМУ ВЫРИЦКОМУ

АКАФИСТ СЩМЧ. ЯРОСЛАВУ ЯМСКОМУ

АКАФИСТ ПРП. СИЛУАНУ АФОНСКОМУ

АКАФИСТ СВ. ВМЧЦ. МАРИНЕ

АКАФИСТ СВ. РАВНОАП. ВЕЛ. КН. ОЛЬГЕ

АКАФИСТ ПРП. БЛГВ. КН. ЕВФРОСИНИИ МОСКОВСТЕЙ

АКАФИСТ СВ. ПРАВ. ИУЛИАНИИ МИЛОСТИВЕЙ, ЯЖЕ В СЕЛЕ ЛАЗАРЕВЕ

АКАФИСТ БЛЖ. КСЕНИИ ПЕТЕРБУРЖСТЕЙ

АКАФИСТ ПРПМЦ. ВЕЛ. КН. ЕЛИСАВЕТЕ

АКАФИСТ ВСЕМ СВ. ЖЕНАМ, В ЗЕМЛИ РОССИЙСТЕЙ ПРОСИЯВШИМ

АКАФИСТ СОБОРУ СВ. ВРАЧЕЙ-БЕЗСРЕБРЕНИКОВ-ЦЕЛИТЕЛЕЙ И ЧУДОТВОРЦЕВ

СПИСОК ВСЕХ СТАТЕЙ

Рубрики

ИКОНА ДНЯ

КАЛЕНДАРЬ

СЧЕТЧИК