АКАФИСТ СВЯТЫМ МУЧЕНИКАМ ФЛОРУ И ЛАВРУ
Кондак 1
Избра́ннии чудотво́рцы и во́ини Христо́вы, ко Го́споду о всем ми́ре моли́твенницы, восхваля́ем вас любо́вию, страстоте́рпцы святи́и Фло́ре и Ла́вре. Вы же, я́ко иму́щии дерзнове́ние ко Святе́й Тро́ице, предста́тельством ва́шим от вся́ких напа́стей нас свободи́те, да благода́рственно вопие́м вам:
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Икос 1
А́нгели земни́и и челове́цы небе́снии яви́стеся, святи́и му́ченицы Фло́ре и Ла́вре, егда́ озари́вшеся све́том и́стиннаго богопозна́ния, я́ко а́гнцы чи́стии страда́ния и му́ки претерпе́ли есте́, подража́юще А́гнцу Бо́жию, взе́млющему грех ми́ра и пострада́вшему да́же до сме́рти, и сподо́бистеся ве́чнаго предстоя́ния у Престо́ла Всеми́лостиваго Спа́са, иде́же вы мольбы́ прино́сите за лю́бящия и и чту́щия вас. Сего́ ра́ди торжеству́юще любо́вию Боже́ственную па́мять ва́шу, восхваля́ем вас:
Ра́дуйтеся, ча́да благослове́нная Отца́ Небе́снаго;
ра́дуйтеся, бра́тия по пло́ти, ве́ру и́стинную позна́вшии.
Ра́дуйтеся, всем се́рдцем Го́спода возлюби́вшии;
ра́дуйтеся, ду́шу свою́ за Него́ положи́вшии.
Ра́дуйтеся, пре́лести ми́ра сего́ отве́ргшиися;
ра́дуйтеся, непоро́чнии а́гнцы ста́да Христо́ва.
Ра́дуйтеся, Бо́га и́стиннаго дерзнове́ннии пропове́дницы;
ра́дуйтеся, в ве́ре Христо́вой ве́рным утвержде́ние.
Ра́дуйтеся, да́же до кро́ве во испове́дании Христо́ве пострада́вшии;
ра́дуйтеся, сла́вою и че́стию от Влады́ки Христа́ увенча́вшиися.
Ра́дуйтеся, свети́льницы пресве́тлии, просвеща́ющии ду́ши на́ша;
ра́дуйтеся, я́ко во всей Це́ркви Бо́жией имена́ ва́ша прославля́ются.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 2
Ви́дя Госпо́дь па́губу душ челове́ческих, идолослуже́нием язы́ческим омраче́нных, по неизрече́нному человеколю́бию Своему́ восхоте́ призва́ти вас, святи́и му́ченицы Фло́ре и Ла́вре, в служе́ние Бо́гу и́стинному, да благовести́те лю́дем Ева́нгелие Христо́во, сло́вом и де́лом наставля́я их богоуго́дно пе́ти всех Творцу́: Аллилу́иа.
Икос 2
Ра́зум Боже́ственный озари́ вас, Фло́ре и Ла́вре, егда́ благоче́стия храни́тели Прокл и Макси́м не то́кмо каменосе́чней му́дрости вас научи́ша, но на ка́мени ве́ры Христо́вы до́бре утверди́ша, на не́мже неотсту́пно да́же до конца́ пребы́сте, со стра́хом Го́сподеви рабо́тающе и наставля́юще ве́рою ду́ши тружда́ющихся с ва́ми. Сего́ ра́ди мо́лим вас, не оста́вите у́бо благода́тною ва́шею по́мощию всех песносло́вящих вас си́це:
Ра́дуйтеся, в труде́х от ю́ности воспи́таннии;
ра́дуйтеся, даро́ванный вам тала́нт умно́жившии.
Ра́дуйтеся, от святы́х муже́й Про́кла и Макси́ма худо́жеству каменосе́чному наста́вленнии;
ра́дуйтеся, ве́ре христиа́нстей и богоуго́дному житию́ от них науче́ннии.
Ра́дуйтеся, Христу́ после́довавшии ве́рою;
ра́дуйтеся, крест Его́, я́ко яре́м, взе́мшии.
Ра́дуйтеся, де́вства и чистоты́ храни́тели;
ра́дуйтеся, Ду́ха Свята́го сосу́ди избра́ннии.
Ра́дуйтеся, се́ятели христиа́нскаго благоче́стия;
ра́дуйтеся, искорени́тели язы́ческаго нече́стия.
Ра́дуйтеся, я́ко свети́льник, горя́й во тьме, язы́ком свети́вшии;
ра́дуйтеся, све́том ве́чным на Небеси́ осия́ннии.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 3
Си́ла Вы́шняго утверди́ вас, егда́ прави́тель страны́ язы́ческия призва́ вас ко устрое́нию красне́йшего хра́ма бого́м е́ллинским. Вы же, святи́и, зо́дчии яви́стеся не то́кмо земни́и, но и духо́внии, и́бо ины́й храм нерукотворе́нный созида́шеся труды́ ва́шими: мно́зи бо лю́ди страны́ тоя́, про́поведию ва́шею науче́ннии, и́стиннаго Бо́га позна́ша и Тому́ Еди́ному навыко́ша пе́ти: Аллилу́иа.
Икос 3
Иму́ще тве́рдую ве́ру в сердца́х ва́ших, Фло́ре преблаже́нне и Ла́вре пресла́вне, небоя́зненно отыдо́сте из оте́чества своего́ во страну́ чужду́ю и та́мо апо́стольское служе́ние восприя́ли есте́: лю́дие, во тьме и се́ни сме́ртней седя́щии, про́поведию ва́шею све́том Ева́нгелия озари́шася; вы же, святи́и, в поще́нии и моли́твах пребыва́сте, днем де́лание творя́, но́щию же моля́ся и це́ну за труды́ своя́ взе́млемую ни́щим раздава́сте. Сего́ ра́ди вас, я́ко пропове́дников Христо́вых ублажа́ем, со умиле́нием зову́ще вам си́це:
Ра́дуйтеся, иску́снии церко́вных зда́ний строи́тели;
ра́дуйтеся, ни́вы Госпо́дни де́латели трудолюби́вии.
Ра́дуйтеся, а́нгельскому житию́ на земли́ поревнова́вшии;
ра́дуйтеся, о́браз любве́ и ве́ры нам показа́вшии.
Ра́дуйтеся, христиа́нскаго благоче́стия после́дователи;
ра́дуйтеся, за́поведей Христо́вых исполни́тели.
Ра́дуйтеся, Ева́нгелия Христо́ва благове́стницы;
ра́дуйтеся, ве́ры правосла́вныя побо́рницы.
Ра́дуйтеся, тьму язы́чества прогна́вшии;
ра́дуйтеся, све́том богове́дения мно́гих просвети́вшии.
Ра́дуйтеся, и́стиннаго Бо́га святи́и служи́тели;
ра́дуйтеся, я́ко ва́ми и́мя Бо́жие прославля́ется.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 4
Бу́ря искуше́ний на́йде на вас, егда́ о́троку, на де́лание ва́ше взира́вшу, ка́мень, отскочи́в, уда́ри во о́ко и изби́ е. Оте́ц же о́трока, и́дольский жрец Мемерти́н, ви́дев окрова́вленное лице́ сы́на, устреми́ся на вас, со мно́гими хулы́, жела́я изби́ти вас. Вы же, де́латели святи́и, кро́тостию зло́бу победи́ли есте́, обеща́юще исцели́ти о́ко сы́ну его́ вско́ре, на Го́спода упова́ние свое́ возложи́вше и воспева́юще Ему́ благода́рственную песнь: Аллилу́иа.
Икос 4
Слы́шав словеса́ ва́ша кро́ткая и уте́шительная, Мемерти́н отпусти́ с ва́ми сы́на своего́. Вы же, уго́дницы Бо́жии, поя́сте ю́ношу на нощь в хра́мину свою́ и нача́сте учи́ти его́ позна́нию и́стиннаго Бо́га. И глаго́ла ю́ноша: «А́ще о́ко мое́ бу́дет, каково́ бе пре́жде, ве́ровати бу́ду и поклоню́ся Бо́гу ва́шему». Тогда́ воста́сте вы, святи́и, и нача́сте со слеза́ми моли́тися к Бо́гу, о исцеле́нии и просвеще́нии не то́чию теле́снаго о́ка, но и духо́вных оче́с ю́ноши. Те́мже ве́ре и дерзнове́нию ва́шему дивя́щеся, восхваля́ем вас си́це:
Ра́дуйтеся, злоре́чие Мемерти́на ни во что же вмени́вшии;
ра́дуйтеся, злосло́вящаго вас благослови́вшии.
Ра́дуйтеся, ору́жием смире́ния и щито́м терпе́ния себе́ вооружи́вшии;
ра́дуйтеся, смири́вшемуся нас ра́ди Христу́ усе́рдно продража́вшии.
Ра́дуйтеся, бра́тия не то́кмо по пло́ти, но и по благода́ти Христа́ Сы́на Бо́жия;
ра́дуйтеся, ми́лости и сострада́ния испо́лненнии.
Ра́дуйтеся, бе́дствующих ско́рии помо́щницы;
ра́дуйтеся, заблу́дших на путь пра́вый наста́вницы.
Ра́дуйтеся, святи́и предста́тели и моли́твенницы на́ши ко Го́споду;
ра́дуйтеся, боля́щих вра́чеве благода́тнии.
Ра́дуйтеся, о́браз нищеты́ духо́вныя в себе́ показа́вшии;
ра́дуйтеся, и́стиннии Ева́нгелия Христо́ва после́дователи.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 5
Боготе́чныя зве́зды яви́стеся, страстоте́рпцы святи́и, я́ко два вели́ка со́лнца зе́млю освеща́ющии и семена́ ве́ры Христо́вы в сердца́х мно́гих язы́чников посе́явшии. Та́ко и о́трок , его́же о́ко моли́твами ва́шими здра́во сотвори́сте, и́стиннаго Бо́га позна́ и Тому́ в ра́дости возопи́: Аллилу́иа.
Икос 5
Ви́дя чу́до ве́лие, в сы́не явле́нное, оте́ц его́ Мемерти́н и́дольскаго служе́ния отве́ргшеся, и́стиннаго Бо́га просла́ви вку́пе с сы́ном свои́м. Вы же, страстоте́рпцы святи́и Фло́ре и Ла́вре, иму́ще помога́ющаго вам в де́лании Ангела Бо́жия, соверши́сте зи́ждемый храм, обы́чаи и́дольския искореня́юще, язы́чники же мно́гия к ве́ре Христо́вой обрати́ли е́сте. Сего́ ра́ди приими́те от нас сие́ благода́рственное славосло́вие:
Ра́дуйтеся, о́ко осле́пшему ю́ноше отве́рзшии;
ра́дуйтеся, от Го́спода да́ром чудотворе́ний на земли́ просия́вшии.
Ра́дуйтеся, язы́ческаго жреца́ ко Христу́ обрати́вшии;
ра́дуйтеся, и сы́на его́ к ве́ре и́стинней приве́дшии.
Ра́дуйтеся, сла́внии в беда́х засту́пницы;
ра́дуйтеся, ми́лости пода́тели преди́внии.
Ра́дуйтеся, свети́льницы, пред Бо́гом горя́щии;
ра́дуйтеся, о душа́х на́ших те́плии моли́твенницы.
Ра́дуйтеся, Боже́ственныя му́дрости испо́лненнии;
ра́дуйтеся, пресла́внии христиа́н помо́щницы.
Ра́дуйтеся, Го́сподеви ве́рно послужи́вшии;
ра́дуйтеся, уго́дницы Бо́жии, на Небеси́ и на земли́ просла́вленнии.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 6
Пропове́дников богопросвеще́нных и апо́столом Христо́вым подража́телей ви́дим вас, дво́ице свята́я, благода́ть бо Госпо́дня излия́ся чрез вас и вои́стину бы́ли есте́ мно́гим лю́дем пропове́дницы ве́ры и́стинныя, приводя́ще их к позна́нию Христо́ву и науча́юще се́рдцем и усты́ воспева́ти Спаси́телю ми́ра: Аллилу́иа.
Икос 6
Возсия́ свет неизрече́нныя сла́вы небе́сныя и испо́лнися сия́ния чу́днаго храм, рука́ми ва́шими, Фло́ре и Ла́вре, созда́нный, в не́мже поста́висте честны́й Крест к восто́ку и сотвори́сте всено́щное славосло́вие Христа́ Бо́га на́шего. Лю́дие же, свет той ви́девше, вся куми́ры и́дольския, для хра́ма того́ угото́ванныя, сокруши́ша, взыва́юще вам та́ко:
Ра́дуйтеся, мрак идолослуже́ния разсе́явшии;
ра́дуйтеся, све́том богоразу́мия нас озари́вшии.
Ра́дуйтеся, язы́ческаго нече́стия обличи́тели;
ра́дуйтеся, путь жи́зни и́стинныя нам показа́вшии.
Ра́дуйтеся, я́ко моли́твами ва́шими благоуха́ния ди́внаго це́рковь испо́лнися;
ра́дуйтеся, я́ко злосмра́дие вра́жие упраздни́ся.
Ра́дуйтеся, тьму пре́лести многобо́жия отгна́вшии;
ра́дуйтеся, зве́зды, све́том и́стины сия́ющия.
Ра́дуйтеся, чуде́с исто́чницы преизоби́льнии;
ра́дуйтеся, чудесы́ ва́шими нас утеша́ющии.
Ра́дуйтеся, неусы́пнии за нас моли́твенницы;
ра́дуйтеся, в ве́ре и́стинней нас утверди́вшии.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 7
Хотя́ яви́ти ми́ру сла́ву му́чеников за ве́ру, благоизво́ли Госпо́дь преда́ти вас, храмозда́тели святи́и, и всех моли́вшихся с ва́ми, в ру́ки мучи́телей; князь бо, уве́девший о сокруше́нии и́долов, лю́тою я́ростию испо́лнися и осуди́ всех уве́ровавших во Христа́ на сожже́ние, вас же, Фло́ре и Ла́вре, бив жесто́ко, посла́ ко иге́мону Илли́рии Ликио́ну. Те́мже страда́ния ва́ша ублажа́юще, благода́рно пое́м о вас Бо́гу: Аллилу́иа.
Икос 7
Но́вая и лю́тая муче́ния угото́ва вам иге́мон Лики́он, егда́ возврати́стеся свя́заннии во оте́чество свое́. Вы же до́блественне претерпе́вше вся, му́жество и непоколеби́мую тве́рдость во испове́дании ве́ры Христо́вы яви́ли есте́. Тогда́ повеле́ иге́мон вве́ргнути вас, святи́и му́ченицы, в студене́ц глубо́к и земле́ю в нем засы́пати. Те́мже мы, благогове́йне воспомина́юще страда́ния и му́ченическую кончи́ну ва́шу, с любо́вию зове́м:
Ра́дуйтеся, на предлежа́щий вам по́двиг с ра́достию восте́кшии;
ра́дуйтеся, во Илли́рии, я́ко со́лнце пресве́тлое, страда́ньми возсия́вшии.
Ра́дуйтеся, я́ко зла́то в горни́ле муче́ний искуше́ннии;
ра́дуйтеся, си́лою Христа́ Царя́ во страда́нии укрепля́емии.
Ра́дуйтеся, муче́ния за Христа́ му́жественно претерпе́вшии;
ра́дуйтеся, же́ртвы непоро́чнии Святе́й Тро́ице яви́вшиися.
Ра́дуйтеся, я́ко возлюби́сте жизнь ве́чную па́че вре́менныя;
ра́дуйтеся, тече́ние жития́ му́ченически сконча́вшии.
Ра́дуйтеся, Ликио́на и слуг его́ терпе́нием удиви́вшии;
ра́дуйтеся, вене́ц побе́дный от Христа́ прия́вшии.
Ра́дуйтеся, любо́вь ва́шу ко Го́споду кро́вию запечатле́вшии;
ра́дуйтеся, к ли́ку добропобе́дных му́ченик сопричте́ннии.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 8
Стра́нницы и прише́льцы по апо́столу яви́стеся на земли́, страстоте́рпцы святи́и, до́льняя презира́юще, го́рних взыску́юще, и бра́тскою любо́вию соедине́нныя, му́ченическую смерть прия́сте. Те́мже и нам помоги́те ва́шими моли́твами доброде́тельное житие́ возлюби́ти, воспева́юще Бо́гу а́нгельскую песнь: Аллилу́иа.
Икос 8
Все́ю душе́ю и всем се́рдцем возлюби́вше Христа́, бра́тие блаже́ннии, и по кончи́не ва́шей не оставля́ете нас, я́ко Бо́жиим изволе́нием по ле́тех мно́зех обрете́ни бы́ша святы́я мо́щи ва́ша и положе́ни бы́ша в Константи́не гра́де во оби́тели Вседержи́теля, источа́юще мно́жество чуде́с всем с ве́рою к ва́шему заступле́нию прибега́ющим и взыва́ющим вам та́ко:
Ра́дуйтеся, в Го́рний Иерусали́м пресе́льшиися;
ра́дуйтеся, с ли́ки небе́сных сил торжеству́ющии.
Ра́дуйтеся, я́ко и по кончи́не ва́шей нас не оставля́ете;
ра́дуйтеся, о́т Го́рних высо́т на по́мощь нам прихо́дящии.
Ра́дуйтеся, я́ко мо́щи ва́ша нетле́нием на земли́ просла́вишася;
ра́дуйтеся, ми́ро благово́нное исцеле́ний источа́ющии.
Ра́дуйтеся, ве́лие дерзнове́ние ко Христу́ обре́тшии;
ра́дуйтеся, страстоте́рпцы Христо́вы, в чудесе́х просла́вленнии.
Ра́дуйтеся, пред престо́лом Бо́жиим ми́ру гре́шному предста́тели;
ра́дуйтеся, неусы́пнии стра́жи на́шего спасе́ния.
Ра́дуйтеся, милосе́рдия и любве́ к лю́дем сосу́ди неисчерпа́емии;
ра́дуйтеся, ко Оте́честву Небе́сному ве́рнии на́ши путеводи́тели.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 9
Вся́кими зна́менми и чудесы́ просла́ви Госпо́дь вас, богоизбра́нная дво́ице Фло́ре и Ла́вре, даде́ся бо вам благода́ть неду́жныя врачева́ти, оби́димыя заступа́ти, в беда́х су́щим по́мощь подава́ти. Те́мже благода́рно вас сла́вим и Бо́гу, просла́вльшему вас, пое́м хвале́бную песнь: Аллилу́иа.
Икос 9
Вети́и ми́ра сего́ не возмо́гут по достоя́нию восхвали́ти доброде́тели и воспе́ти сла́ву, угото́ванную святы́м во Ца́рствии Небе́снем, его́же насле́дницы яви́стеся вы, святи́и му́ченицы Фло́ре и Ла́вре. Сподо́бите и нас соприча́стницы сея́ сла́вы бы́ти, уго́дницы Бо́жии, и неотсту́пни бу́дите нам помо́щницы, вся блага́я да́рующе нам ва́шими моли́твами, да умиле́нно зове́м вам си́це:
Ра́дуйтеся, я́ко о сла́ве ва́шей собо́ри святы́х возвесели́шася;
ра́дуйтеся, ро́ду христиа́нскому при́сное утеше́ние.
Ра́дуйтеся, я́ко моли́твами ва́шими Влады́ку всех умилостивля́ете;
ра́дуйтеся, вся блага́я проше́ния на́ша исполня́ющии.
Ра́дуйтеся, я́ко су́щим в беда́х и напа́стех избавле́ние подае́те;
ра́дуйтеся, скорбя́щих и уныва́ющих благода́тнии посети́тели.
Ра́дуйтеся, я́ко о спасе́нии всех люде́й правосла́вных ко Христу́ ру́це воздева́ете;
ра́дуйтеся, святи́и вра́чеве, боле́зни на́ша исцеля́ющии.
Ра́дуйтеся, гре́шники к покая́нию обраща́ющии;
ра́дуйтеся, ско́рии вра́чеве душ и теле́с на́ших.
Ра́дуйтеся, ско́рби на́ша в ра́дость претворя́ющии;
ра́дуйтеся, ре́ки чуде́с и дарова́ний духо́вных.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 10
Спасти́ хотя́ще от бед и напа́стей Русь Правосла́вную, вси сы́нове росси́йстии от лет дре́вних пропове́дуют благода́тную по́мощь ва́шу во бране́х, святи́и му́ченицы Фло́ре и Ла́вре, я́ко во́ем христолюби́вым при́сно на враги́ побо́рствуете и побе́ды да́руете на иноплеме́нники, вою́ющия на нас и на ве́ру правосла́вную. Сего́ ра́ди по до́лгу прославля́юще вас, благода́рно пое́м Бо́гу побе́дную песнь: Аллилу́иа.
Икос 10
Стена́ и заступле́ние, уго́дницы Бо́жии Фло́ре и Ла́вре, яви́стеся в годи́ну ско́рби страны́ на́шея, егда́ изыдо́ша во́ини Вели́каго кня́зя Дими́трия Донска́го в день па́мяти ва́шея на би́тву с ага́ряны, и побе́ду на по́ли бра́ни Кулико́ве одержа́ша. Те́мже и ны́не сы́нове росси́йстии с ве́рою к вам приступа́юще, прие́млют хода́тайством и засту́пничеством ва́шим ско́рую по́мощь и избавле́ние от всех зол, воспева́юще вас си́це:
Ра́дуйтеся, я́ко просла́вистеся в земли́ на́шей мно́гими чудотворе́нии;
ра́дуйтеся, Росси́и Бо́гом да́ннии покрови́тели.
Ра́дуйтеся, Вели́кому кня́зю Дими́трию Донско́му в би́тве с ага́ряны посо́бствовавшии;
ра́дуйтеся, христолюби́вому во́инству его́ неви́димии помо́щницы.
Ра́дуйтеся, заступле́нием ва́шим от наше́ствий иноплеме́нных нас избавля́ющии;
ра́дуйтеся, моли́твенницы кре́пцыи за страну́ на́шу Росси́йскую.
Ра́дуйтеся, во́ини Христо́вы непобеди́мии;
ра́дуйтеся, благочести́вых во́инов в би́твах укрепля́ющии.
Ра́дуйтеся, я́ко в ну́ждах благочести́вым лю́дем росси́йским помога́ете;
ра́дуйтеся, от них с любо́вию прославля́емии.
Ра́дуйтеся, уго́дницы Христо́вы, наро́дом росси́йским возлю́бленнии;
ра́дуйтеся, я́ко и мы гре́шнии имена́ ва́ша с ве́рою призыва́ем.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 11
Пе́ние всеумиле́нное прино́сят вам лю́дие ру́сстии, издре́вле почита́ющии вас, я́ко покрови́телей коне́й и труда́ ямщи́цкаго, и мно́гия хра́мы во и́мя ва́ше свято́е в стране́ на́шей воздви́гшии, иде́же ико́ны ва́ши чудесы́ просла́вишася, пред ни́ми же и ны́не лю́дие в ве́ре утвержда́ются, к Небеси́ же сердца́ своя́ восхища́ют, воспева́юще ра́достно Бо́гу, ди́вному во святы́х Свои́х, а́нгельскую песнь: Аллилу́иа.
Икос 11
Светопода́тельныя свети́льники ве́мы вас, страстоте́рпцы святи́и Фло́ре и Ла́вре, му́ченическою кончи́ною показа́вшии нам путь к незаходи́мому Све́ту Христу́, ны́не же престо́лу Бо́жию предстоя́щии и мрак страсте́й и грехо́в наших моли́твами ва́шими разгоня́ющии. Озари́те у́бо от го́рних высо́т оледене́лая сердца́ на́ша, просвети́те зе́млю на́шу све́том ве́ры Христо́вы и бу́дите ве́рнии на́ши предста́тели ко Го́споду, да му́друю дво́ицу Све́та у́мнаго, просвеще́ние всем подаю́щего, ублажа́ем та́ко:
Ра́дуйтеся, я́ко све́том невеще́ственным ду́ши на́ша просвеща́ете;
ра́дуйтеся, доброде́телей ва́ших све́том осия́ннии.
Ра́дуйтеся, я́ко зве́зды страну́ Росси́йскую чудесы́ ва́шими освети́вшии;
ра́дуйтеся, свети́льницы, ду́ши на́ша благода́тию озаря́ющии.
Ра́дуйтеся, я́ко мно́зи хра́ми и́мене ва́шего зе́млю на́шу укра́сиша;
ра́дуйтеся, я́ко хра́мы сия́ благослове́нием ва́шим осеня́ете.
Ра́дуйтеся, я́ко в них от бурь жите́йских волн спаса́емся;
ра́дуйтеся, я́ко сы́нове росси́йстии хода́тайством ва́шим спасе́ния сподобля́ются.
Ра́дуйтеся, всех богоуго́дно жи́ти хотя́щих му́дрии наста́вницы;
ра́дуйтеся, о лю́бящих и чту́щих вас предста́тели.
Ра́дуйтеся, я́ко Це́рковь Ру́сская благогове́йно вас прославля́ет;
ра́дуйтеся, я́ко и ны́не ве́рнии к покро́ву ва́шему прибега́ют.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 12
Благода́ть едине́ния и братолю́бия испроси́те у Го́спода оте́честву на́шему и всем лю́дем правосла́вным, свяще́нная дво́ице страстоте́рпцы святи́и Фло́ре и Ла́вре, и умоли́те Го́спода, да утверди́вшеся в за́поведех Его́, вси ве́рнии возлю́бят друг дру́га и еди́ными усты и еди́нем се́рдцем воспою́т Спаси́телю на́шему благода́рственную пе́снь: Аллилу́иа.
Икос 12
Пою́ще чудеса́ ва́ша и мно́гое к стра́ждущим милосе́рдие, восхваля́ем труды́ и по́двиги, ублажа́ем му́ченическую кончи́ну, почита́ем хода́тайство и заступле́ние ва́ше о всех тре́бующих по́мощи, благодари́м Го́спода, дарова́вшаго Це́ркви Свое́й Святе́й ди́вных моли́твенников и предста́телей о нас гре́шных и со умиле́нием зове́м вам:
Ра́дуйтеся, бра́тие, друг дру́га и́скреннею любо́вию возлюби́вшии;
ра́дуйтеся, зо́дчии, храм Ду́ха Боже́ственнаго в себе́ яви́вшии.
Ра́дуйтеся, Го́споду Сла́вы ны́не предстоя́щии;
ра́дуйтеся, Пресвяты́я Богоро́дицы избра́ннии раби́ и уго́дницы.
Ра́дуйтеся, арха́нгелов и а́нгелов досто́йнии собесе́дницы;
ра́дуйтеся, му́ченическаго пресве́тлаго собо́ра зве́зды сия́ющия.
Ра́дуйтеся, я́ко со безпло́тными си́лами трисвяту́ю песнь Бо́гу воспева́ете;
ра́дуйтеся, я́ко со все́ми святы́ми о нас гре́шных Го́споду мо́литеся.
Ра́дуйтеся, от враг ви́димых и неви́димых стено́ и огражде́ние;
ра́дуйтеся, Це́ркве Правосла́вныя ди́вное украше́ние.
Ра́дуйтеся, я́ко па́мять ва́шу ве́рнии на земли́ сла́вят;
ра́дуйтеся, я́ко имена́ ва́ша напи́сана суть на Небесе́х.
Ра́дуйтеся, святи́и му́ченицы Фло́ре и Ла́вре, рая́ Христо́ва цве́ти прекра́снии.
Кондак 13
О Боже́ственная и светоно́сная дво́ице Фло́ре и Ла́вре, добропобе́днии му́ченицы, на Небеси́ всегда Святе́й Тро́ице предтоя́щии, вонми́те ма́лому моле́нию на́шему и песносло́вию смире́нному, его́же ми́лостивно прии́мше, умоли́те всех Творца́ Го́спода изба́вити нас скорбе́й и боле́зней вре́менных и ве́чных и сподо́бити нас со а́нгелы и все́ми святы́ми во Ца́рствии Небе́снем воспева́ти Бо́гу побе́дную песнь: Аллилу́иа.
Этот кондак читается трижды, затем 1-й икос «А́нгели земни́и и челове́цы небе́снии…» и 1-й кондак «Избра́ннии чудотво́рцы…».
МОЛИТВА СВЯТЫМ МУЧЕНИКАМ ФЛОРУ И ЛАВРУ
Прехва́льнии му́ченицы Фло́ре и Ла́вре, вас не земля́ потаи́ла есть, но Не́бо прия́т вы, во е́же бы́ти вам моли́твенники и предста́тели о чту́щих с любо́вию честну́ю па́мять ва́шу. Моли́теся же за ны, трудолю́бцы незло́бивии, да подви́гнет Госпо́дь и нас, в труде́х и утесне́нии су́щих, к де́ланию за́поведей Его́, да не то́кмо о пи́щи и питии́, но и о е́же ка́ко угоди́ти Го́сподеви попече́мся; услы́шите печа́ли и воздыха́ния на́ша, и да не озло́бятся до конца́ ду́ши на́ша, но да возгоря́тся любо́вию бра́тскою друг ко дру́гу, да пребу́дем в ми́ре и единомы́слии, я́коже и вы, самобра́тнии блаже́ннии. Наипа́че же утверди́те ны в ве́ре святе́й и пра́вей, ю́же иму́ще в сердца́х на́ших, не устраши́мся в поноше́нии и униже́нии и, всяких обстоя́ниих, и́миже одержи́ми есмы́, но, я́ко испыта́ние си́лы ве́ры на́шея с благодаре́нием сие́ прии́мше, до́брое испове́дание соблюде́м, в не́мже и пре́йдем от юдо́ли сей в ве́чное ца́рствие Го́спода на́шего, Ему́же сла́ва и держа́ва во ве́ки веко́в. Ами́нь.
СВЯТЫМ МУЧЕНИКОМ ФЛОРУ И ЛАВРУ
Тропарь, глас 4:
Преудобре́нную и богому́друю дво́ицу пресве́тлую / восхва́лим, ве́рнии, по достоя́нию, / Фло́ра преблаже́ннаго и Ла́вра всечестна́го,/ и́же усе́рдно Тро́ицу несозда́нную я́сно пропове́даста всем, /те́мже пострада́вше до кро́ве, / и венцы́ пресве́тлыми увязо́стеся, / моли́теся Христу́ Бо́гу, да спасе́т ду́ши на́ша.
Кондак, глас 8:
Добавьте комментарий